Kryetari i Partisë Demokratike, Sali Berisha në konferencën e përjavshme me gazetarët ka kritikuar ashpër vendimin surprizë të qeverisë për të mbullur institucionin e arsimit parauniversitar “Mehmet Akif Ersoy”.
Berisha rrëzoi poshtë pretendimet e MAS se vendimi vjen në kuadër të shkeljeve ligjore të drejtuesve të kolegjit për nisjen e vitit shkollor 2022-2023 në ambiente të pamiratuara prej tyre, duke theksuar se vendimi është i motivuar nga Turqia.
“E konsideroj një akt më të rëndë, mbylljen pa asnjë shpjegim publik, por vetëm nën diktatin e Erdoganit, të shkollës që mban një nga emrat më të nderuar, autorit shqiptar të himnit turk, “Mehmet Akif”. Një kolegj nga më të mirët. Për probleme ideologjike që ka Erdogani me Gylenin, ato janë probleme të Turqisë, jo të Shqipërisë. Nga Shqipëria nuk do pranonim kurrë të projektoheshin akte kundër Turqisë, por kjo që po ndodh është e paprecedentë”, tha kreu i selisë blu.
Në vijim Berisha theksoi se kryeministrit Rama duhet t’i vijë turp nga ky akt, në një kohë kur është babai i një djali, në moshë të ngjashme me vogëlushët të cilëve ju mbyll kopshti, po në një institucion turk si “Turgut Ozal”.
“I them Edi Ramës, ke mbyllur një kopsht ku ka qenë 250 Zaho. Të skuqesh nga turpi që u mbyll vogëlushëve kopshtin. Një akt të tillë nuk mund ta ndërmerrte kush. Edi Rama, ka treguar se je i aftë për çdo lloj akti. Të mbyllësh një kopsht model, pse përkulesh, duhet të mendoje 250 herë për këtë vendim. Nuk ndërmerrej ky vendim. E njëjta gjë për kolegjin “Mehmet Akif”. Të zbresë një kryeministër dhe të mbyllë një kopsht, nuk ka akt më çnjerëzor”, deklaroi Berisha.
