Janë luajtur pesë javë kampionat dhe tashmë dalëngadalë nisim të kemi më të qartë panoramën e ekipeve pretendente dhe e kundërta. Nga të mëdhenjtë, Partizani është skuadra e vetme që ka dalë tërësisht brenda pritshmërive, përfshirë atë rrëshqitje të vogël ndaj Erzenit.
Skuadra e kuqe ka arritur të fitojë katër nga pesë sfidat e para dhe të regjistrojë një nga startet më të mira në sezonet e fundit. Është një skuadër që përpiqet të dominojë, por ky i këtij sezoni, duket një Partizan, që di t’i shfrytëzojë episodet dhe të jetë më pragmatist se vjet. Këtë e tregon një statistikë e thjeshtë. “Demat” kanë shënuar gjithsej 6 gola në këto 5 ndeshje të para dhe 5 prej tyre i kanë shënuar në zhvillimet e goditjeve standarde.
FAULLET – Dy prej golave të shënuar nga Partizani janë realizuar nga pika e bardhë e 11 metrave. Fillimisht shënonte Hoti në ndeshjen e javës së parë ndaj Egnatias, të cilën skuadra e Kolelës e fitonte 2-1 me përmbysje e më pas në ndeshjen e javës së dytë ndaj Laçit ishte radha e Skukës të shënonte me penallti. Dibrani mposhti Dajsinanin dhe i dhuroi fitoren me shifra minimale të kuqve në Elbasan. Ndërkohë, të hënën ndaj Kukësit Cara nxori nga repertori i tij një goditje shumë të bukur nga faulli dhe shënoi ndaj Kukësit golin e parë të ndeshjes.
SKEMAT – Dy gola të tjerë kanë ardhur në zhvillimet e goditjeve të ndaluara. Të parin në këtë mënyrë e ka shënuar Skuka. Dibrani tundi rrjetën e Bylisit me një skemë mes tij dhe Da Silvas, që nxori blof gjithë kundërshtarët. Braziliani i dha një pasim shumë të zgjuar me parabolë dhe Skuka goditi saktë, duke mposhtur portierin Haremi. Rrjeta e dytë me skemë ishte ndaj Kukësit. Murataj dha një kros në zemër të zonës dhe Bitri iu shmang mbrojtësve dhe sundoi ajrin, duke ekzekutuar me kokë një “penallti” në lëvizje.
DEFEKTI – Kur një skuadër është e aftë të shënojë nga goditjet e ndaluara është padyshim një armë shumë e fuqishme për të fituar ndeshjet. Megjithatë, vetëm një gol nga aksion i rrjedhshëm, edhe ai i shënuar nga jashtë zonës, është shumë pak për një skuadër si Partizani. Me siguri, përtej ecurisë së mirë, stafin teknik e shqetëson jo pak kjo statistikë. /PanoramaSport
