E pranishme në komision e Ligjeve këtë të mërkurë, deputetja e Partisë së Lirisë, Erisa Xhixha ,u ndal te veprimet e ndërmarra nga Autoriteti i Dosjeve dhe pretendimet e ngritura ndaj Ilir Metës si bashkëpunëtor i Sigurimit.
Xhixho kërkoi nga organet e drejtësisë që të zbardhin sa më shpejt këtë çështje, teksa iniciativën për hapjen e dosjeve e quajti antikushtetuese dhe antiligjore.
“Unë mendoj që e gjithë kjo iniciativë anti-ligjore dhe antikushtuetuese, edhe në argumentet që u tha nga kolegu Bylykbashi për rënien e sigurisë juridike, jo se qytetarët marrin ndonjë lajm sot, pasi e përjetojnë atë çdo ditë rënien e sigurisë juridike, por mënyra si po vihet në lëvizje parlamenti me një procedurë antiligjore, duke u kthyer Autoriteti i Dosjeve në gjykatë, është e papramueshme, drejtësia duhet të zbardh sa më shpejt këtë çështje që ndodhet në tryezën e saj. Padyshim kjo çështje duhet të ketë dhe nëj refuzim nga opinion publik”, ka thënë Xhixho.
Nga ana tjetër drejtuesja e Komisionit të Ligjeve, Klotilda Bushka, i kërkoi që të përqëndrohej tek propozimet ligjore dhe nëse kishte ankesa ndaj një institucioni të posaçëm, t’i drejtohej organeve kompetente.
“ Sa për sqarim kemi marrë dy nisma dhe nuk jemi organi që shqyrtojmë se është vepruar drejt gabim apo keq nga një institucione. Kush ka pretendime ndaj një institucioni t’i drejtohet organeve kompetente”, është shprehur Bushka.
