Presidenti i zgjedhur Ilir Meta ka bërë sot deklarata të ashpra nga Lezha, ku shkoi për të takuar kryeplakun e LSI-së, i cili u dhunua mbrëmjen e kaluar. Ai tha se nëse nuk kapen kriminelët, atëhere “jemi të detyruar të armatosim popullin”.
“Unë do të armatos popullin nëse policia nuk i lidh këta zagarë”, – tha Meta në Lezhë ku vizioi Gjovalin Gjinin, kryeplakun e dhunuar të fshatit Rraboshtë në Lezhë.
Kjo është deklarata më e ashpër e tij në këto ditë të fushatës. Nëse kthehemi pas nëë kohë, rreth një vit më parë, një deklaratë të ngjashme për armatosje të popullsisë e ka bërë edhe ish-kryeministri Berisha.
Më herët gjatë paradites Ilir Meta u shfaq sërish para mediave për të sulmuar Edi Ramën dhe drejtorin e Përgjithshëm të Policisë së Shtetit, Haki Çako, për deklaratat e kryeministrit për përfshirje të policisë në fushatë.
Meta tha se këto deklarata të Ramës janë fundi i shtetit. Sipas tij policisë i mjafton njolla e drogës dhe nuk i duhet njolla e zgjedhjeve. Ditë më parë nënkryetari i LSI-së, Luan Rama ka thënë se Haki Çako është peng i bandave të drogës. Ai i është referuar drejtorit të Përgjithshëm të Policisë së Shtetit edhe si “Haki Droga”.
Me gjasë pritet që fushata të vijë duke u tensionuar në javën e saj të fundit. PS dhe LSI kanë ashpërsuar tonet mes tyre, ndërsa Ilir Meta ka kërcënuar gjithashtu edhe me mosdekretim të qeverisë së ardhshme nëse preket vota.
