Kryeministri Edi Rama ka folur për sulmet kibernetik në një intervistë për gjermanenen “Der Spiegel”, një ditë pasi hakerat publikuan dokumente sekrete shtetërore.
Rama tha se “falë specialistëve tanë të IT-së, ekspertëve nga Microsoft dhe qeveria amerikane, ne arritëm të zvogëlojmë dëmin”.
DER SPIEGEL: Zoti kryeministër, Shqipëria ndërpreu marrëdhëniet diplomatike me Iranin pak ditë më parë. Diplomatët kishin vetëm 24 orë kohë për t’u larguar nga vendi. Çfarë fshihet pas kësaj?
Edi Rama: Irani sulmoi vendin tonë me një sulm masiv kibernetik. Qëllimi ishte të shkatërroheshin të gjitha shërbimet digjitale të qeverisë që ne kemi ndërtuar me shumë mund përgjatë shumë viteve. Falë specialistëve tanë të IT-së, ekspertëve nga Microsoft dhe qeveria amerikane, ne arritëm të zvogëlojmë dëmin.
Grupi “Homeland Justice”, që ka marrë përsipër autorësinë e dy sulmeve kibernetike në vend, publikoi këtë të Hënë në “Telegram” materiale të reja. Edhe pse kryeministri Rama deklaroi tre ditë më parë se të dhënat e marra nga hakerat janë “krejtësisht irrelevante sa i përket sensivitetit të tyre” dhe “nuk janë dokumente sekrete”, në materialet e publikuara nga hakerat kishte shumë dokumente të klasifikuara si “sekret”.
