Kryetari i Partisë së Lirisë, Ilir Meta ka reaguar pas raportit të “Nismës Globale kundër Krimit të Organizuar Ndërkufitar”, që thotë se janë pastruar 1.2 miliard euro nga sektori i ndërtimit.
Gjatë një postimi në rrjetet sociale, Meta thekson se raporton qartëson lidhjen e betonizuar midis krimit të organizuar dhe qeverisë Rama. Ndër të tjera, Meta shprehet se shumë familje zgjedhin të emigrojnë pasi është e pamundur që të blenë një apartament në Tiranë ku çmimet prekin shifra stratosferike nga 2 mijë deri në 5 mijë euro për metër katror.
“Është e qartë tashmë pse çmimet e apartamenteve në Tiranë kanë arritur shifrat stratosferike 2000, 3000 madje dhe 5000 euro për metër katror. Është po aq e qarte arsyeja përse shumë prej familjeve të reja zgjedhin emigrimin, pasi të pasurit një apartament të tyre në Tiranë është një mision i pamundur. 1.2 miliard eurot e pastruara në sektorin e ndërtimit gjatë këtyre tre viteve në Tiranë, siç bëhet e ditur nga raporti i Nismës Globale kundër Krimit të Organizuar Ndërkufitar mbi të gjjtha qartëson lidhjen e betonizuar midis krimit të organizuar dhe kësaj Qeverie”, shkruan Ilir Meta.
