Deputeti shqiptar nga Lugina e Preshevës në Parlamentin e Serbisë, Shaip Kamberi, është kërcënuar nga deputetja së Partisë Socialiste, Snezhana Paunoviç.
Paunoviç ka kërkuar që deputeti shqiptar të arrestohet.
Në një intervistë për Euronews Albania, Kamberi tregoi se arsyeja e vetme e kërkesës së nënkryetares së kuvendit të Serbisë lidhej me deklarata e tij në kuvend se Kosova është shtet i pavarur dhe se Serbia është e detyruar të bisedojë me këdo drejton Kosovën.
“Ndaj edhe reagimi i saj dhe dy deputetëve të tjerë se duhet të arrestohet kushdo që thotë se Kosova është shtet i pavarur. Më e rënda ishte se kjo ndodhi në prani të presidentit Vuçiç. Nëse një deputeti i mohohet e drejta e fjalës, imagjinoni se çfarë ndodh me një njëri të thjeshtë që kërkon të drejtat e tij. Nuk pati asnjë reagim nga deputetët e tjerë serbë çka tregon për kontrollin absolut të shtetit në Serbi”, tha Kamberi.
“Kanë propozuar arrestimin tim. Kjo sepse një ditë më parë, gjatë fjalimit tim rreth Kosovës, kisha theksuar domosdoshmërinë e udhëheqjes së politikës me ambicie realiste. Zonja Paunoviç kërkon të arrestohet deputeti i cili në seancën parlamentare, duke shfrytëzuar lirinë e mendimit dhe shprehjes – liri kjo e “garantuar” me Ligjin për Kuvendin – rreth një pike të rendit të ditës duke kërkuar udhëheqjen e politikës së ballafaqimit me realitetin.
Kur është në pyetje Kosova, inkuizicioni në Serbi që moti ka marrë hov. Duke i cilësuar tradhtar apo armiq të Serbisë ata që hapur flasin cili është realiteti rreth Kosovës. Sot, ky inkuizicion është bërë edhe parlamentar. Po fole të vërtetën të kërcënojnë se do të djegin në furrën e druve. Kjo është ajo që ka kërkuar deputetja Paunoviç nënkryetare e parlamentit”, shkroi Kamberi në Facebook.
