Deputetja e LSI në qarkun e Beratit, Silva Caka, dje bëri një deklaratë të ashpër kundër Rilindjes, edhe pse forca e saj politike vijon të jetë në bashkëqeverisje me Partinë Socialiste. Ajo tha se Rilindja është kthyer në bandën më të madhe të trafikut të drogës në Europë. Natyrisht fjalët e znj.Caka habitën jo pak ndjekës të politikës, për të vetmin fakt se natyra e saj është krejt tjetër. Por ndonjëherë halli të detyron të dalësh nga vetja dhe në fakt znj.Caka kishte vërtet hall. Pak përpara daljes në konferencë për mediat, bashkëshorti i saj ishe larguar nga puna.
Boldnews.al disponon ekskluzivisht urdhrin për lirimin nga detyra të Neritan Çelës, specialist në Zyrën e Regjistrimit të Pasurive. Mësohet se z.Çela është bashkëshorti i deputetes Caka, e cila mesditën e djeshme akuzoi Rilindjen dhe Partinë Socialiste për manipulim zgjedhje. “Ai bëri çdo përpjekje që opozita të mos hynte në zgjedhje, me qëllim shkatërrimin e opozitës dhe manipulimin e zgjedhjeve përmes policisë të lidhur me klanet e drogës. Ai Rilindjen e ktheu në ndërmarrjen më të madhe të drogës në Europë. ndaj dhe inskenimi i turpshëm në Berat, në bashkëpunim me segmente kriminale të policisë, për gjoja blerje votash është një përpjekje e dështuar për të trembur LSI”, ka thënë Caka.
Në fakt deklarata e deputetes së LSI dukej se lidhej me një hetim që policia e Beratit nisi për deputetin e LSI në këtë qark, Gledion Rahovica, i cili bashkë me drejtorin e spitalit të Beratit dyshohet se kanë shpërndarë para në këmbim të votave. Por deklaratat e ashpër, pikërisht në ditën kur drejtori i ri i Hipotëkës shkarkoi nga detyra bashkëshortin e deputetes, lë dyshime se znj.Caka ka patur hallin e saj personal. Neritan Çela, me profesion inxhinier, deri ditën e djeshme mbante detyrën e specialistit në Sektorin e Mirëmbajtjes së ALBSReP në Zyrën Qendrore të Regjistrimit të Pasurive të Paluajtshme Tiranë. Urdhri mban firmën e kryeregjistruesit Arjan Bylykbashi, por në të nuk pasqyroht motivacioni i shkarkimit nga detyra të z.Çela.
