Një aksident automobilistik është shënuar pasditen e së Enjtes në Vlorë.
Ngjarja ka ndodhur në afërsi të Nartës, ku një automjet tip ‘Benz’ taksi është përplasur me shtyllën.
Për pasojë kanë mbetur të plagosur 6 persona mes të cilëve 2 fëmijë të moshës 13 dhe 6 vjeç.
Tri ambulanca dhe zjarrfikësja shkuan në në vendngjarje për t’iu ardhur në ndihmë të aksidentuarve.
Drejtuesi i taksisë u shoqërua nga policia në spital. Blutë konfirmuan se ai rezultonte i dehur dhe proceduan me arrestimin e shoferit.
“Nga specialistët për Qarkullimin Rrugor në DVP Vlorë, u bë arrestimi në flagrancë për veprat penale ‘Shkelja e rregullave të qarkullimit rrugor’ dhe ‘Drejtimi i automjeteve në mënyrë të parregullt’ i shtetasit S. D, 54 vjeç, banues në Vlorë, i cili pas kryerjes së testit të alkoolit ka rezultuar se drejtonte mjetin në gjendje të dehur në masën 0.987 mg/l”, njoftoi policia.
S.D. udhëtonte me bashkëshorten, 2 fëmijët e tij dhe 2 të afërm të tjerë, të cilët ndodhen në spital, jashtë rrezikut për jetën.
