Kryetari i Partisë së Lirisë Ilir Meta, në një takim me strukturat e kësaj partie në Tiranë, deklaroi se pagat e shqiptarëve nuk rriten pasi prioritet i qeverisë janë koncesionet dhe inceneratorët.
Meta theksoi se OSHEE është një nga ndërmarrjet elektorale kriminale.
“Pedagogët u ngritën në protestë për pagat, por prioriteti i qeverisë janë koncesionet dhe inceneratorët. Si ka mundësi që nuk ka para për pagat e pedagogëve dhe rrogat e shqiptarëve. Rilindja ka para për koncesione e tendera sekretë. OSHEE është një nga ndërmarrjet elektorale kriminale. 23 për qind e energjisë që prodhohet humbet. Paskan shpërthyer ndërtimet pa leje në kullat në Tiranë. Ndërtimet pa leje në të gjitha kullat ku Edi Rama shkon për të prië kafe. Ku ishte deri tani Edi Rama, nuk i pa ndërtimet pa leje? Tani është koha për veprim, është koha për organizim”, tha Meta.
Ai nuk kurseu akuzat ndaj ish-kreut të PD-së Basha, kur tha se me marrëzinë e tij i fali të gjithë pushtetin vendor Ramës
“Të dashur motra dhe vëllezër të Partisë së Lirisë është kënaqësi që të takohemi sot, pikërisht vetëm pak muaj na ndajnë nga rikthimi i bashkive në duart e qytetarëve dhe nga rikthimi i Bashkisë së Tiranës në dorën e qytetarëve të Tiranës. Edhe pak muaj për t’i dhënë fund marrëzisë së Lulushit që i fali gjithë bashkitë dhe këshillat bashkiak Edi Ramës”.
Meta shtoi se Tirana është shndërruar në një lavatriçe të pastrimit të parave të krimit, në vend që të ishte qyteti i konkurrencës së ndershme.
“Lajmi që vjen nga Meksika është që edhe karteli i madh i Meksikës paska investuar këtu. Patjetër se ne El Chapon e kemi në krye të qeverisë. Thoni shpesh ky është si Escobari. Ato librat e Escobarit i ka qejf shumë i di përmendsh ai. Jemi shumë larg Kolumbisë, Kolumbia 6 muaj e pati Eskobarin në Parlament dhe e përzuri, tani ka ardhur koha që dhe ne ta përzëmë këtë Escobarin tonë”, tha Meta.
Meta shtoi se kjo është një qeveri mizore e cila nuk ka në agjendë problemet sociale të qytetarëve, duke mos indeksuar pagat dhe pensionet për të përballuar krizën e çmimeve.
“Ky është modeli i tyre në bashki dhe qeveri. Mashtrim dhe vjedhje, vjedhje dhe mashtrim. Vetëm problemet sociale nuk janë në agjendën e kësaj qeverie. Kjo është një qeverisje mizore, një sekt me vese. Këta nuk duan t’ia dinë për paga dhe pensione si dhe problemet e rinisë shqiptarë. Partia e Lirisë e nisi këtë sesion parlamentar me një projektligj për indeksimin e pagave dhe pensioneve, ende asnjë përgjigje nga qeveria”, tha Meta.
