Kryetari i Partisë për Drejtësi, Integrim dhe Unitet, Shpëtim Idrizi, i ftuar në emisionin “Të Paekspozuarit” të Ylli Rakipit, shprehu rezerva për qeverinë e krijuar sëfundmi si rezultat i marrëveshjes Rama-Basha.
Idrizi: Pas akuzave të dyja palëve për tre muaj, përfunduam në një qeveri të çuditshme mes tyre. Kjo s’ka nodhur në ndonjë vend, është e çuditshme që për muajin e fushatës të bësh këtë lloj qeverisje. Gjithsesi e rëndësishme u bë mirë që të gjithë forcat politike hynë në këto zgjedhje. Kjo fushatë do të mbahet mend si fushata e batuteve dhe gallatave, ku shumë pak flitet për programe. Dy partitë e mëdha i quajnë qytetarët miza. Këta janë si elefanti dhe ariu, kuptohet kush bën më shumë dëm. Dy partitë e mëdha i kanë sjellë këto vite dëm të madh vendit.
I pyetur për sondazhin e publikuar në një nga televizionet private, Idrizi u shpreh tepër skeptik.
Idrizi: Ky sondazh në rastin e PDIU ka gabuar, për shembull në vitin 2013 e nxjer në tre sondazhe të para me 1.5 % dhe në fund fare ne dolëm me 5 deputetë. Aq sa na nxjer ai sondazh ne i kishim njerëz në hapjen e fushatës. Nëse ky sondazh do vazhdojë, unë do i them ta heqin siglën e PDIU. Nuk dua të ndodh që edhe sondazhet t’i bëjmë pjesë të tregut kinez.
