Rreth 1 orë e 30 minuta ka zgjatur protesta te inceneratori i Tiranës, e thirrur nga Partia e Lirisë, që e cilëson një vepër kriminale.
Kryetari i Partisë së Lirisë, Ilir Meta në një fjalë të mbajtur për gazetarët me mbërritjen në protestë, dha një mesazh për Prokurorinë e Posaçme.
“Çdo qytetar që ka ardhur është një zë i fuqishëm për t’i thënë SPAK-ut dhe të gjithëve boll më me drejtësi me regji. Boll burgosët fukarenjtë pse nuk paguajnë faturat e dritave. Ja ku e keni monumentin e korrupsionit”, tha Meta.
Disa folës mbajtën një deklaratë në podiumin e krijuar enkas për këtë protestë. E para ishte Brisida Shehaj, ndërsa një deklaratë u mbajt dhe nga kreu i PL-së Ilir Meta.
Brisida Shehaj deklaroi se qeveria ka paguar 64 milionë euro për një incenerator që nuk ekziston dhe në vend të tij ka vetëm ca zyra dhe një mensë. Një tjetër folës ishte regjisori Emond Budina, i cili tha se “në Shqipëri nuk ka qeveri, por sundon mafia dhe bandat”.
Deputetë të PD-së si Ervin Salianji dhe Edmond Sapho iu bashkuan protestës. Ky i fundit mbajti dhe një fjalim, duke u shprehur se jemi përpara një krimi, dhe duhen ndëshkuar autorët. Ai theksoi se çdo shqiptar duhet të dalë në protestë për t’i dalë zot vetes.
Ilir Meta, kreu i PL, tha se SPAK-u po mbyll sytë përballë aferës së inceneratorëve, ndërsa qeverinë e cilësoi një organizatë kriminale.
Mbyllja e fjalimit të Metës shënoi dhe fundin e protestës.
