Policia ka reaguar për ngjarjen e ndodhur në rrugën “Pavarësia” të Durrësit.
Mediat raportuan se dje një shtetas i shpëtoi atentatit me snajper në qytetin bregdetar, ndërsa në reagim zyrtar ditën e sotme, uniformat blu nuk përmendet në asnjë moment objektivi e atentatit, Akil Nerjakun. Policia bën me dije është identifikuar automjeti me të cilën ka lëvizur autori i ngjarjes por nuk zbulon më shumë detaje për shkak të hetimit.
“Më datë 12.09.2022, rreth orës 12:00, në lagjen nr. 13, Durrës, në rrugën “Pavarësia”, është qëlluar një herë, me armë zjarri, në drejtim të një automjeti të parkuar, në pronësi të shtetasit B. A., 52 vjeç, banues në Maqedoninë e Veriut. Si rezultat i veprimeve të shpejta hetimore dhe profesionale është bërë i mundur identifikimi i automjetit me të cilin ka lëvizur personi që ka qëlluar në drejtim të automjetit të parkuar. Vijon puna intensive për kapjen e autorit. Për arsye hetimi, nuk bëjmë me dije të dhëna të tjera”, njofton policia.
Gjithashtu policia bën me dije se në momentin e të shtënës me armë, në automjet nuk ka qenë asnjë person. Grupi hetimor, nën drejtimin e Prokurorisë pranë Gjykatës së Rrethit Gjyqësor Durrës, vijon punën për zbardhjen dhe dokumentimin e plotë të rrethanave të ngjarjes.
