Shtetet e Bashkuara të Amerikës i kanë dalë sërish në krah Shqipërisë duke dënuar sulmin e dytë kibernetikt ndaj vendit tonë pasi këtë herë u paralizuan të gjitha pikat kufitare të Shqipërisë duke shkaktuar kaos dhe radhë të gjata.
Ambasada e SHBA-ve në Shqipëri nëpërmjet një postimi në “Facebook”, ka bërë me dije se sekretari amerikan i shtetit, Anthony Blinken ka pasur një bisedë telefonike me kryeministrin Edi Rama në kuadër të sulmeve kibernetike të Iranit ndaj Shqipërisë. Në njoftimin thuhet se Blinken dënon me ashpërsi veprimet e Iranit, ndërsa theksoi rëndësinë e bashkëpunimit mes SHBA-ve dhe Shqipërisë si dy vende aleate të NATO-s.
Postimi i plotë nga ambasada amerikane në Tiranë:
“Sekretari i Shtetit Antony J. Blinken foli dje me kryeministrin shqiptar Edi Rama. Sekretari Blinken dënoi sulmin e papërgjegjshëm kibernetik të 9 shtatorit kundër sistemeve të kontrollit kufitar të Shqipërisë, i cili pason sulmin kibernetik të Iranit ndaj Shqipërisë më 15 korrik. Sekretari theksoi rëndësinë e bashkëpunimit SHBA-Shqipëri, si aleatë në NATO, për sigurinë rajonale”. – Zëdhënësi i Departamentit të Shtetit të SHBA, Ned Price.
Me efekt të menjëhershëm Shqipëria ka ndërprerë marrëdhëniet diplomatike me Republikën Islamike të Iranit. Kujtojmë se më 9 shtator sistemi TIMS u godit nga një sulm kibernetik pas të cilit autoritetet qeveritare dhe kryeministri Edi Rama thanë se fshihej Irani.
