Opozita ka reaguar pas Kongresit Kombëtar të Arsimit të zhvilluar nga kryeministri Edi Rama.
Deputetja, Ina Zhupa, u shpreh se fondi 100 mln euro i dhuruar nga BE është shpërdoruar.
“BE ka dhënë 100 milion euro për arsimin në Shqipëri. Siç la të kuptohej ambasadorja, dhe siç duket me sy të lirë çdo ditë, këto fonde europiane janë shpërdoruar, dhe cilësia e shkollimit dhe infrastruktura shkollore dhe universitare, ka bërë mbrapa. 100 milion euro mund t’i kishin ndërruar faqen shkollave shqiptare”, u shpreh Zhupa në një reagim.
Madje sipas PD-së, Rama ka penguar edhe pjesëmarrjen e opozitës pasi i druhej realitetit që mund të thuhej në prezencë të ambasadorëve.
“Kongresin e hodhi poshtë mos përfshirja e Komisionit të Edukimit në parlament,qe është organi me i lartë ligjvënës në fushën e arsimit, ku jep llogari ministria. Frika se mos flisnin përfaqësuesit e opozitës, bëri që mos të dëgjonin as deputetët e tyre”, shtoi Zhupa.
Nga Kamza në shkollën “Ibrahim Basha”, deputetja e Partisë së Lirisë Erisa Xhixho përpara prindërve dhe nxënësve të kësaj shkolle e cila prej muajit mars qëndron e mbyllur ka kërkuar ndërhyrjen e menjëhershme të bashkisë për hapjen e saj.
Në mungesë të plotë informacioni për afatin e punimeve, deputetja e Partisë së Lirisë Erisa Xhixho ka dorëzuar peticionin e prindëve në bashkinë Kamëz.
Zëdhënësja e Partisë Demokratike, Floriana Garo, ka deklaruar se ky vit nis me 226 mijë nxënës më pak në 15 vjet teksa vijon pa zgjidhje mësimi me turne dhe ai kolektiv.
“Ky vit nis me 226 mijë nxënës më pak në 15 vjet. Ky vit nis pasi mbi 700 shkolla, të të gjitha niveleve janë mbyllur në të gjithë vendin kurse 90% e shkollave të vendit janë pa ngrohje dhe ujë të rrjedhshëm ndërkohë që fondet vidhen dhe ndërtohen shkolla me 4-5 milionë euro, d.m.th 7-8 herë më të larta se në Europë.Viti shkollor nis në kushte ku 150.000 nxënës do të mësojnë me turne, dhe mbi 50.000 nxënës do të mësojnë në klasa kolektive”
Ndërsa deputetja, Flutura Açka, u shpreh në Komisionin për arsimin se abetarja kombëtare duhej fillimisht të pilotohej para se të kalonte në projektin e plotë, duke lënë anash patriotizmat.
Buxheti për arsimin ndryshe është premtuar dhe ndryshe është në të vërtetë, tha ajo.
“Banka Botërore ka kërkuar në mënyrë të vazhdueshme që buxheti i arsimit të shkojë në 5% të Prodhimit të Brerndshëm Bruto. Ne kemi pasur ulje, jemi në 3%”, u shpreh.
