Me emërimin e ish-Drejtorit të Përgjithshëm të Policisë, Ardi Veliu në krye Agjencisë së Mbikëqyrjes Policore, është miratuar edhe rregullorja e re për këtë institucion.
Punonjësit e saj do t’i nënshtrohen testit të drogës dhe do të kenë akses të limituar në rrjetet sociale.
Rregullat në dokumentin e botuar në fletoren zyrtare janë të qarta dhe parashikojnë përjashtimin nga radhët e AMP-së, të atyre që refuzojnë testin e drogës.
Sa i përket ruajtjes së integritetit dhe përgjegjshmërisë në punë, punonjësve u kërkohet të përdorin shumë rrallë rrjetet sociale dhe të mos prononcohen në media.
“Punonjësi i Agjencisë nuk duhet të japë leksione, të marrë pjesë në ndonjë diskutim publik, ose në ndonjë program televiziv apo radiofonik, të prononcohet apo botojë në median e shkruar, të bëjë postime në rrjete sociale, mbi çështje që lidhen me punën e Agjencisë, pa miratimin paraprak të drejtorit të përgjithshëm të Agjencisë. Punonjësit që autorizohen për paraqitjen në median vizive, duhet të jenë me veshje zyrtare”, nënvizohet në rregullore.
