Janë zbuluar pamjet e vjetshme të plazhit, në të cilin po ndërtohej një Beach Bar, që sipas hetimeve të policisë dhe AMP, ishte pa leje.
Pikërisht në plazhin që ndodhej para tokës së shtetases Arjola Bajo (Dhrami), ka ekzisuar edhe vitin e kaluar një plazh me leje nga Agjensia e Bregdetit, në të cilin ka qenë i ndërtuar edhe një Beach Bar, i cili kishte leje nga KKTU me nr. 52 datë 28.05.2025, konkretisht “Leje për strukturë shërbimi në stacionet e plazhit për objektin: Strukturë shërbimi”, kjo në funksion të parcelës së plazhit me nr. SR-41 me sipërfaqje 389 m2. Madje sipas burimeve, në leje përcaktohej përvec Beach Bar-it, edhe platformë sistemimi me sipërfaqje 110 m2.
Plazhi dhe Beach Bar kanë mbajtur emrin tregëtar “Azur Beach Bar” dhe kanë funksionuar si të tillë gjatë gjithë sezonit veror 2025, duke pasur fluks pushuesish.
Gjithashtu mësohet se toka me sipërfaqje 1200 m2 pranë plazhit, është në pronësi të shtetases Arjola Bajo, e cila e ka trashëguar pas vdekjes 23 vite më parë të babait të saj Jaho Bajo, një biznesmen i njohur nga Saranda, pronar edhe i sipërfaqeve të tjera në qytet.
Jaho Bajo e ka përfituar parcelën 1200 m2 me vendim të Këshillit Bashkiak Sarandë në vitin 1999.
Arjola Bajo e cila është shpallur në kërkim, sipas burimeve ndodhet jashtë shtetit dhe ka shprehur vullnetin për të ardhur dhe dhënë sqarime pasi rezulton e shpallur në kërkim.
Paraprakisht Bajo, përmes përfaqësuesit të saj ligjor, ka dhënë deklarime se strukturat ndodheshin aty prej vitit të kaluar dhe aty po bëheshin sistemime lidhur me sezonin e ri turistik dhe funksionimin si plazh të sipërfaqjes para tokës së saj, për të cilën ajo nuk ka konflikt dhe ka dakordësi absolute.
