Tymi e flakët raportohet se kanë përfshirë dje dhe sot sipërfaqe të konsiderueshme në zonën e Shijakut, ku janë djegur një sasi e madhe plehrash.
Kreu i Partisë Lirisë, Ilir Meta foli për krim mjedisor duke hedhur akuza mbi bashkinë e këtij qyteti se po djeg tonelata me plehra si mekanizëm i tyre për të ‘pastruar’ mjedisin dhe se po helmojnë banorët me ndotjen e krijuar.
Kjo, tha Meta, bëhet në një kohë kur qytetarëve po u vidhen miliarda lekë për inceneratorët jashtë funksionit.
Nga ana tjetër, kreu i bashkisë Shijak, Elton Arbana tha se kjo gjë nuk është aspak e vërtetë pasi bëhet fjalë për zjarrvënie të qëllimshme. Ai madje theksoi se është një akt i opozitës me qëllimin për të prodhuar lajme.
“Kishin vënë mbrëmë një zjarr të qëllimshme, sot e kanë vënë në territorin, kemi marrë masat për neutralizimin e flakëve. S’është djegie nga njerëzit e bashkisë tonë, por e qëllimshme, po nga opozita për ta kthyer në lajm. Nuk është ajo që ish-presidenti ka shkruar në rrjete sociale. Rast pas rasti ne hetojmë, dhe jo më pak se para 5 minutash me erdhi informacion se kanë kapur një tjetër person përgjegjës për zjarrëvënie në Maminas”, tha Arbana për mediat.
