Skena të denja për filmat e Hollywood janë ato që janë regjistruar në qendër të qytetit të Napolit.
Në zonën më të frekuentuar nga turistët dhe vendasit, midis Piazza Trieste e Trento dhe Piazza del Plebiscito, një person që lëvizte me një skuter hapi zjarr, duke shkaktuar panik tek klientët e dhjetëra restoranteve.
Këshilltari rajonal i Campania Francesco Emilio Borrelli, eksponent i Europa Verde me anë të një postimi në Facebook publikoi imazhet e kamerave të sigurisë.
Pamjet tregojnë njerëzit që ishin ulur në tavolina duke ikur nga sytë, këmbët në përpjekje për të mbrojtur veten.
“Momente terrori, jashtë një lokali, me të gjithë klientët, përfshirë gra dhe fëmijë, që ikin me vrap sapo dëgjojnë të shtënat. Një rrëmujë e përgjithshme, siç tregohet nga një video tronditëse që na dërguan, e diktuar nga paniku. Pamjet janë shqetësuese: ato përplasin realitetin në fytyrë, na tregojnë se tani po jetojmë në një klimë të luftës guerile urbane, ku krimi jeton dhe vepron me shpejtësi të plotë”, – shkruan Borrelli.
Skena të tilla janë të përsëritura në Napoli, me grabitës që nuk u trembet aspak syri nga policia apo kamerat e sigurisë dhe terrorizojnë qendrën e qytetit në ditën për diell.
