Një 27-vjeçar shqiptar është lënë në burg nga Gjykata e Lartë e Irlandës së Veriut pasi u kap në një fermë kanabisi në Angli. Klinton Hysa dyshohet gjithashtu se ka gisht edhe në një prej fermave më të mëdha të kanabisit në Irlandën e Veriut, me një vlerë prej 200 mijë paundësh.
Për këtë arsye, ai është transferuar nga Britania e Madhe drejt Irlandës së Veriut. Gjykata e Belfastit refuzoi lirimin me kusht të shqiptarit pasi i druhet arratisjes së tij nga vendi. Sipas dosjes së prokurorisë 27-vjeçari u zbulua pasi policia gjeti gjurmët e gishtërinjve në një nga radiatorët e përdorur për energjinë elektrike që shërbente për rritjen e bimëve narkotike, shkruajnë mediat irlandeze.
Hysa u ndalua më 9 gusht në Britaninë e Madhe dhe u transferua në Irlandën e Veriut ku u mor në pyetje nga drejtësia irlandeze.
Ndërkaq, Michael Boyd, avokati mbrojtës i 27-vjeçarit shqiptar theksoi në gjykatë se klienti i tij vjen herë pas herë në Irlandën e Veriut ku punon si dekorues i pronave të ndryshme. Por gjykata nuk e mori parasysh këtë fakt duke qenë se kishte prova të forta kundër Hysës.
“Sasia e kanabisit që u gjet në këtë vend është jashtëzakonisht e madhe. Nëse e lëmë të lirë me kusht ai arratiset”, ka deklaruar gjykatësi. Për këtë arsye, Hysa është lënë në burg deri në pritje të një vendimi të dytë.
