Ish-kreu i Policisë, Ardi Veliu mësohet se është emëruar në krye të Agjencisë së Mbikëqyrjes Policore, duke zëvendësuar në këtë post Mehmet Rrumbullakut.
Zëvendëskryeministrja dhe ministrja e Energjisë, Belinda Balluku njoftoi këtë të Mërkurë pas mbledhjes së qeverisë lirimin nga detyra të zv.ministrit të Energjisë, Ardi Veliu.
“Që të dy (Balluku njoftoi edhe lirimin nga detyra të zv.ministres së Mbrojtjes, Dallëndyshe Bici) gjej rastin ti falenderoj për punën që kanë bërë dhe pozicionet që kanë mbajtur dhe dua t’iu informoj se do të ketë për ta detyra të rëndësishme në ditët në vijim të cilat ne i bazojmë në eksperiencën që të dy kanë dhe për më tepër në pozicione kyçe që janë të nevojshme në gjithë mbarëvajtjen e punës në Republikën e Shqipërisë”, tha Balluku.
Kështu, Ardi Veliu zëvendëson në postimin e drejtimit të Agjencisë së Mbikëqyrjes Policore Mehmet Rrumbullakut. Ky i fundit është përfolur në media si zëvendësuesi i Gledis Nanos në krye të Policisë së Shtetit.
Po pas mbledhjes së sotme të qeverisë, ministri i Brendshëm Bledi Çuçi njoftoi shkarkimin nga detyra e drejtuesit të Policisë, Gledis Nano, për “mospërmbushje të objektivave”.
