Moskë – Presidenti rus Vladimir Putin nënshkroi të shtunën një dekret për përfitime financiare për njerëzit që ikinan nga territori ukrainas për të ardhur në Rusi, përfshirë pensionistët, gratë shtatzëna dhe personat me aftësi të kufizuara, njofton Reuters.
Dekreti, i publikuar në një portal qeveritar, përcakton pagesa mujore pensioni prej 10,000 rublash (ose 170 dollarë) për njerëzit që janë detyruar të largohen nga territori i Ukrainës që nga 18 shkurti.
Personat me aftësi të kufizuara do të kenë gjithashtu të drejtën për të njëjtën mbështetje mujore, ndërsa gratë shtatzënë kanë të drejtë për një përfitim të vetëm. Dekreti thotë se pagesat do t’u bëhen qytetarëve të Ukrainës dhe Republikave Popullore të vetëquajtura Donetsk dhe Luhansk – dy rajone separatiste të mbështetura nga Rusia në lindje të Ukrainës që Moska i njohu si të pavarura në shkurt, në një vendim të dënuar nga Ukraina dhe Perëndimi si të paligjshëm.
Më 18 shkurt, Putin urdhëroi që çdo person që arrinte në Rusi nga Donetsk dhe Luhansk, t’i jepet një pagesë prej 10,000 rubla.
Moska u ka dhënë ukrainasve edhe pasaporta ruse në atë që Ukraina dhe Shtetet e Bashkuara thonë se është një përpjekje e paligjshme e Moskës për të aneksuar territorin që ka pushtuar.
