Nga Boldnews.al
Shfaqja u bë. Thonë se Ai, i madhi, që ka dalë nga “Akademia Soros” dhe që është trajtuar ca kohë edhe nga Dinamo, i kishte organizuar të gjitha… Kampionen e Europës në garën e 3000 metrave me pengesa në atletikë, Luiza Gega e hipën në një automjet lukzos (kabriolet). Ngjitur me shoferin, (një djalë Rilindas) ngjishej ministrja Evis Kushi, pas e shkreta Luizë që dha djersë, mund dhe shumë sakrificë personale për të arritur suksesin personal, por edhe të vendit. Nuk është e thënë që kjo ditë të ishte e saj. Duke zgjatur duart e yndyrosura përtej llërëve pushtetarët “shqyen” medaljen e Luizës, për të marrë ata merita mbi diçka personale.
Drejtuesit e qeverisë dhe kreu i bashkisë Tiranë, folën aq gjatë për veten sa në ndonjë rast Luizën kapione e ngatërruan me Elisën, edhe ajo kapione në “sportin” e saj. I pari e nisi fjalimin Fidel Ylli, ish-deputeti i PS-së që u katapultua fort lehtë si kreu i Komitetit Olimpik Shqiptar, foli ca duke vendosur theksin në rikthimin e lotove sportive, si një mundësi sipas tij për të rritur buxhetin për sportet në vend. Më pas ministrja Kushi. Edhe ajo gjatë e më gjatë me një gëzim të dukshëm për medaljen që shndrinte në gjoksin e sportistes së vërtetë kampiones Gega. Më lehtë fjalimin e pati ministrja Bora Muzhaqi. Se kishte prishur hiç terezinë, fjalimin që mbajti dje e lexoi edhe sot. Kushedi, do e ruajë mbase edhe për në Parlament….
Këtu ndalet koha, këtu nis një tjetër epokë e pështirë, në kufijtë e një neverie që të bën të golçosh dioksid karboni. Kryetari i Bashkisë së Tiranës Erion Veliaj nisi me sportin dhe përfundoi me “ndërzimin artificial” të pistave sportive që na paskan zënë sytë dhe nuk i shohim, të fushave të futbollit që qenkan kudo por ne nuk i dallojmë, për sakrificat e tij dhe mbi të gjitha duke u ankuar që si “kampion” i vërtetë i kërcimit së larti (me kullat shumëkatëshe), nuk po e linin gazetarët dhe disa mendje të prishura që nuk e duan këtë vend sipas tij, vetëm se na kritikokan punën e kryetarit.
Foli edhe për Luiza Gegën, por një fjalë për të e tre për veten, gjeniu i kryeqytetit, ky punëmbaruar i oligarkisë disa herë duke lëvizuar duart për të bashkuar fjalët me gjestikolacionet përplasi mikrofonin. Sakrificë për këtë njeri që edhe në evenimentin që mbahej për Luiza Gegën nuk kishte si të mos përmendte udhëtimin e tij drejt Ukrainës dhe sakrificat e kryeministrit tonë dhe të vetë atij për ta çuar majë më majë sportin në vend.
Në fund u shfaq Ai. Ideatori, kampioni, grabitësi i suksesit të të tjerëve, dhuruesi i shfaqjeve dhe mjeshtri mbi mjeshtrat i propgandës. Në tentativë për të lënë “aforizma” të dala nga gjirizet e Rilindjes, kryeministri herë pas herë fliste për Luizën për të dalë aty ku ai ka shtegun e tij, të përbaltjes së tjetrit dhe ngritjes së madhështisë personale, qoftë edhe si Gjeli majë incenaratorëve”.
Kampione Luizë! Paçka se në një ditë mbete peng i laramanëve politik medalja është e jotja dhe e çdo të riu dhe të reje që po rritet me sakrificë në këtë vend të varfër që gëlon nga korrupsioni dhe shpreson se një ditë do ia dalin të shpallen kampionë.
