Firma e cila solli “në pushtet” Partinë Socialiste, duke i organizuar fushatën elektorale të vitit 2013, është “shpërblyer” në vijimësi nga Erion Veliaj. Madje, ka arritur të përfitojë miliona dollarë para publike, duke organizuar shfaqjet propagandistike të kryetarit të Bashkisë së Tiranës por edhe të disa ministrive.
Por, nëse në vitin 2013 paratë ishin të vetë PS-së, gjatë këtyre viteve firma është paguar nga paratë e shqiptarëve të varfër. Para pak javësh, redaksia e BoldNews.al publikoi një investigim sesi Erion Veliaj po shpenzonte plot 1 milionë USD për aktivitete propagandistike, madje kur jemi futur në vitin elektoral. Në korrik ne publikuam dokumente sesi gjatë 12 muajve, Bashkia e Tiranës do të organizojë disa koncerte me këngëtarë vendas e të huaj, por edhe aktivitete të tjera, të cilat janë “shplarje truri” për zgjedhjet lokale të 2023-shit.
Lali Eri fillon fushatën, 1 mln USD për aktivitete propagandistike për 12 muaj
Në foto: Denoncimi i BoldNews.al në korrik 2022 për tenderin 1 milionë USD
Ndërkohë, redaksia jonë vijoi të “ndiqte” këto para’, të cilat natyrisht që do të shkonin për “klientë” të Veliaj apo të Partisë Socialiste.
Sipas dokumenteve që disponon BoldNews.al, në datën 15 korrik 2022, Bashkia e Tiranës ka shpallur fituese firmën “PROSOUND” për tendering me objekt “blerje shërbimi për aktivitete të ndryshme për Bashkinë Tiranë”.
Një firmë e cila është e njohur në Bashkinë e Tiranës, por edhe shumë pranë vetë Veliajt, e cila i është gjendur pranë në eventet propagandistike, madje edhe gjatë kohë që Lali Eri ka drejtuar Ministrinë e Kulturës.
Por, vitet e fundit, firma ka pësuar rritje, teksa ka fituar miliona lekë nga Bashkia e Tiranës apo edhe nga institucionet në varësi të Erion Veliajt, sicc është Agjencia e Parqeve dhe Rekreacionit, ku në vitin 2019 ka fituar rreth 90 milionë lekë të rinj për “shpenzime qeramarrje aparate, paisje teknike, makineri (foni, paisje ndriçimi, videoprojektor)” apo edhe për shpenzime të tjera qiraje (karrige, skena, stenda etj). Në të gjitha procedurat firma ka qenë e vetme në garë.
Faksimile: Dokumentet e KQZ-së, ku firma “PROSOUND” është paguar nga PS-ja për fushatën elektorale të vitit 2013
BoldNews.al vijoi hulumtimin, teksa shfletoi dokumente të Komisionit Qendror të Zgjedhjeve, apo të denoncimeve të opozitës, të cilat hedhin dritë se firma “PROSOUND” është paguar në vitin 2013 nga Partia Socialiste, për fushatën elektorale që e “solli në pushtet”.
Me fatura figuron se është paguar dhjetëra milionë lekë, për shërbime fonie apo edhe për karrige, pra me të njëjtin aktivitet që ka edhe sot. Por, në dokumentet e analizuara nga redaksia jonë rezulton se pikërisht pas ardhjes në pushtet të PS-së, firma ka pësuar rritje, duke fituar “me thasë” para publike. Nëse para 2013-ës paratë ishin me “pikatore”, pas këtij viti ka fituar miliarda lekë.
