Personi në foto është Madrit Ulqinaku, 25 vjeçari i cili u vra me armë zjarri këtë mbrëmje në qytetin e Elbasanit.
Autori i dyshuar është K.Sh., 20 vjeç i cili dyshohet se e ka qëlluar për vdekje Ulqinakun pas një konflikti për motive të dobëta.
Ngjarja ka ndodhur pranë stadiumit “Elbasan Arena”, një zone kjo mjaft e populluar në qytet.
“Rreth orës 21:50, në lagjen ‘Kongresi’, gjatë një konflikti për motive të dobëta midis disa të rinjve, dyshohet se shtetasi K.SH, rreth 20 vjeç, ka qëlluar me armë zjarri pistoletë dhe për pasojë ka humbur jetën shtetasi Madrid Ulqinaku, rreth 25 vjeç, banues në Elbasan”, thuhet në një njoftim të policisë.
Pas të shtënave, dyshohet se autori është larguar me një automjet, bashkë me dy persona të tjerë.
“Shërbimet e Policisë kanë shkuar menjëherë në vendngjarje, së bashku me grupin hetimor. Është rrethuar zona dhe vijon krehja e saj për të bërë të mundur kapjen e autorit. Grupi hetimor, nën drejtimin e Prokurorisë, vijon punën për zbardhjen dhe dokumentimin e plotë të rrethanave të ngjarjes”, shtojnë të njëjtat burime.
