Kryetari i “Omonia”-s në Himarë, Fredi Beleri, komentoi në MCN TV, me vendimin për shpalljen e Porto Palermos park natyror, duke u shprehur se kjo është një përpjekje e qeverisë Rama për t’u marrë tokat pronarëve, grekë apo shqiptarë.
Beleri theksoi se për këtë çështje do t’i drejtohet gjykatave vendase, asaj Kushtuetuese, si dhe Gjykatës së Strasburgut.
Është vjedhja e radhës. Të gjitha nismat ligjore nga 2015-ta kanë vetëm një qëllim, të varfërojnë banorët vendas në favor të klientëve të qeverisë. Porto Palermo është një vend i lakmuar për turizëm, por s’ka asgjë për t’u shpallur zonë e mbrojtur. S’është bërë dëgjesë publike me grupet e interesit dhe pronaret. Duke parë sjelljen e Ramës na bën të dyshojmë. Një qeveri që s’ka treguar asnjë lloj interesi për mjedisin, na bën të dyshimtë pse duhet të ndërmarrë këtë nismë, në kundërshtim me ligjet e veta dhe Kushtetutën, pa pyetur banorët. Mos pyetja e banorëve na bën të dyshojmë.
Prona në këtë zonë u takon banorëve vendas. Ka pronarë që janë bërë me AMTP, ka që janë bërë nga kthimi i pronave, apo me vendim gjyqësor. S’mund të dimë çfarë roli ka luajtur z. Goro. S’ka dalë publikisht. Ai ka ndaluar së qeni kryetar i bashkisë. Z.Goro s’ka mendim, u nënshtrohet vendimeve të qeverisë. Pronat janë rrëmbyet nga sistemi komunist. Kanë kaluar edhe 30 vjet demokraci, në vend të rregullohet është përkeqësuar. I jemi drejtuar ndërkombëtarëve dhe Athinës.
Është problem që mund të zgjidhet duke bërë presion te shteti shqiptar, ndërkombëtarët. Si komunitet jemi treguar konstruktiv. Akoma s’po bëhet regjistrimi i pronave. Qeveria kërkon mënyra për mos regjistrimin e pronave të banorëve, qoftë grekë apo shqiptarët. Është përpjekje e qeverisë për të marrë tokat nga ata që u takon, në favor të hajdutëve. Kjo bëhet duke zbatuar ligje që janë në kundërshtim me gjithë praktikën ndërkombëtare. Në radhë të parë do t’u drejtohemi gjykatave vendase. Do t’i drejtohemi edhe Gjykatës së Strasburgut dhe Gjykatës Kushtetuese për t’u shprehur për këtë padrejtësi”.
