Nga Vlora ku po zhvillon një takim me qytetarët në kuadër të turit “Shqipëria në rrezik”, kreu demokrat Sali Berisha tha se potencialet që ka Vlora mund të begatojnë ekonnomitë e qytetarëve.
Referuar ngjarjes tragjike në Himarë, ndodhur ditën e djeshme, Berisha tha se 7 vjeçaren e bluajti skafi i komisarit, një skaf i paregjistruar.
“Nga trafikant e morën e bënë polic, nga polic e bënë skafist dhe pastaj e bënë vrasës. Dhe për të shpëtuar, Edi Rama quan ata që reagojnë vampirë mediatikë dhe politikë. Po si mos të reagojmë ne, kur fatin e asaj fëmije mund ta kishte fëmija i çdo qytetari”, tha Berisha.
Ai tha se vampirë janë njerëzit pranë Ramës, që i mbështet dhe e mbështesin. Berisha tha se vampirë janë ata që fshehin ngjarjet.
“Ndodhin ngjarje ndër më tragjiket. Buzë uji, se 7-vjeçarja nuk mund të shkojë thellë e bluan, skafi i komisarit. Nuk ndodh në botë kjo. Komisari skafin të paregjistruar. E thoshte sot një qytetar shumë bukur: Ky kryeministër na thotë të dënohet ai që e kreu. Jo, ai të dënohet, por të dënohet edhe ai që e merr nga trafikant dhe e bën polic, nga polic e bën skafist, nga skafist e bën vrasës.
A është kështu apo jo? Pastaj, për të larë duart, thotë vampirët politikë dhe mediatikë. Bën fjalë për vampirë politikë dhe mediatikë që reagojnë. Si të mos reagojmë kur secili nga ne mund të kishte fëmijën, vajzën, djalin, mbesën në breg. Si mund t’ia bluash fëmijën?
Vampirë janë njerëzit pranë tij që ai i mbron, i mbështet.
A nuk i mori jetën ambulanca Samuel Ndojit, 10-vjeçar, në Gjirokastër? Si na thanë për të? Na thanë se ajo po transportonte një grua shtatzënë me urgjencë. Një gazetar trim doli aty dhe tha është gënjeshtër. Por merrte dhe çonte pasagjerë me lekë.
Drejtori i Përgjithshëm i Policisë na mashtroi, ai mbulonte krimin. Kurse gazetari u bë dëshmitar i të vërtetës.
Ardit Gjoklaj, e murosën në plehra, ndërmarrje qeverie. Gazetari e nxori. Kush ishte vampir ai që po e fshihte apo ai që po thoshte të vërtetën? Klodian Rashën e vranë tek dera e shtëpisë. Çfarë na thanë vampirët e Edi Ramës? A nuk na thanë që u gjet revolja në pellg? Doli që s’kishte asnjë lidhje. Media dhe qytetarët reaguan. Por ai habitet, si ka mundësi një reagim i tillë. Këta kanë humbur çdo ndjeshmëri. Kanë humbur ndjeshmëritë njerëzore.
Kur Samuelit i merrte jetën Samuelit me 100 km shpejtësi, Olta Xhaçka shprehte pikëllimin nga hotelet në Himarë, edhe pse ajo ishte një krizë nga më të mëdhatë që kishte vendi. Ky ngrihet dhe thotë janë vampirë. Kjo është një goditje e madhe ndaj turizmit, ndaj asaj familje, ndaj vendit. Turizmi këtë vit për fatin më të keq dëshmoi një rënie të madhe me pasoja shumë serioze”, tha Berisha.
Ndonëse ka pranuar se Shqipëria nuk ka traditë në turizëm, Berisha tha se kjo pasuri mahnitëse po shndërrohet në një mallkim.
“Sot ky vit është me kapacitete turistike të boshatisura si asnjëherë më parë. Sot ata që kanë investuar në kapacitetet turistike po mendojnë si të shpëtojnë nga falimentimi apo si të shesin investimet e tyre”, tha Berisha.
Ai u shpreh se turizmi duhet të ishte gjenerator kryesor për ekonominë, por situata ku jemi, tregon një tablo tjetër.
Në fjalën e tij, Berisha tha se në këtë situatë u arrit jo për shkak të pandemisë, por për shkak të politikave që ndjek Qeveria ndaj turizmit.
“Gjej qytetarë që më thonë nuk shkoj në Jug sepse më kushton më shtrenjtë rruga se një biletë avioni. Njëri më thotë që për të shkuar në Dhërmi i duhen 130 mijë lekë naftë, ndërsa tjetri më thotë ai paska makinën e mirë, se mua më duhet dyfishi.
Sot këtu ushqimet kushtojnë 7-10 % më shtrenjtë se në Bashkimin Europian dhe kjo është e dhënë statistikore e Eurostat.
A ka marrë një masë kjo qeveri për të lehtësuar turizmin në këtë periudhë? Çfarë fondesh ka angazhuar kjo Qeveri për operatorët turistikë? Asgjë. Turizmin dhe Shqipërinë po e rrënon vjedhja”, tha Berisha.
Ai shtoi se nga Velipoja te Kepi i Stillos nuk ka një roje bregdetare, pasi licencat i kishin marrë ata që administrojnë plazhet dhe ata s´ka para të paguajnë rojet.
