Shefi i Organizimit në Partinë Demokratike, Klevis Balliu thotë se hierarkia në Policinë e Shtetit është shkatërruar.
Duke iu referuar ngjarjes së rëndë në Himari ku Arjan Tase përplasi për vdekje një 7-vjeçare në Potam të Himarës, Balliu theksoi se rroga e një polici nuk mjafton për të mbyllur muajin, e jo më për të blerë një skaf mijëra euro.
“Nuk është çështja e deteve, është çështja e shkatërrimit të hierarkisë së Policisë së Shtetit. Personi në fjalë është një person i akuzuar, i lidhur me trafikun e drogës. Si ka mundësi që disa efektivëve të policisë nuk iu mjafton rroga e tyre për të mbyllur muajin, kurse të tjerë paskan skafe nga 30 dhe 50 mijë euro.
Ato janë skafe që përdoren kryesisht për narko trafik. Një polic nuk e ka mundësinë që ta marrë atë skaf”, derklaroi ai në një intervistë për “Euronews Albania”.
Një ngjarje e rëndë ndodhi mesditën e së martës në plazhin e Potamit në Himarë, ku një fëmijë e mitur u përplas për vdekje teksa ishte në breg, nga një skaf i cili drejtohej nga shtetasi Arjan Tase.
Ai mbante detyrën Shef Seksioni i Policimit në Komunitet në Komisariatin e Policisë Elbasan dhe pas kësaj ngjarjeje, është përjashtuar nga Drejtori i Përgjithshëm i Policisë së Shtetit, Gledis Nano.
Mbi të është ngritur akuza e vrasjes nga pakujdesia dhe pritet që brenda 48 orësh të njihet edhe më masën e sigurisë në gjykatën e Vlorës.
