Një ngjarje e rëndë është regjistruar këtë të diel, rreth orës 13:40, në plazhin e Gjipesë në Vlorë, ku një turist gjerman është goditur nga helikat e një gomoneje.
Sipas autoriteteve policore, dyshohet se shtetasi Krenar Velaj, 27 vjeç, banues në Orikum, duke drejtuar një mjet lundrues gomone ka dëmtuar, gjatë kohës që ishte duke bërë zhytje në afërsi të mjetit lundrues, shtetasin D. S., 46 vjeç, banues në Gjermani.
Ky i fundit ka mbetur i plagosur rëndë, ku burime për mediat bëjnë me dije se ka pësuar prerje të gjymtyrëve të poshtëm dhe në krah. Ai fillimisht është dërguar në spitalin e Himarës dhe më pas është dërguar me helikopter me urgjencë drejt spitalit të Traumës për mjekim më të specializuar, për shkak të gjendjes së rëndë shëndetësore.
Burime bëjnë me dije se ka qenë drejtuesi i gomonoes, ai i cili e ka nxjerrë fillimisht në breg të detit të plagosurin. Top Channel ka publikuar edhe një foto ku shfaqet 27-vjeçari Krenar Velaj duke e mbajtur për krahu turistin gjerman të plagosur.
Sipas Policisë, mjeti lundrues që ka shkaktuar incidentit është me dokumentacion të rregullt dhe ndodhej jashtë zonës së sigurisë dhe në një distancë të konsiderueshme nga tapat që kufizojnë zonën e notimit.
Raportohet se drejtuesi i mjetit lundrues Krenar Velaj, së bashku me persona të tjerë, të cilët kanë qenë dëshmitarë në këtë ngjarje, janë shoqrluar në stacionin e Policisë Dhërmi. Autoritetet thonë se grupi hetimor =, nën drejtimin e Prokurorisë, po vijon punën për zbardhjen dhe dokumentimin e plotë të kësaj ngjarjeje.
Rasti i përsëritur
Në vendin tonë janë regjistruar disa incidente, ku helikat e gomoneve dhe skafeve plagosin pushuesit në bregdetin shqiptar.
Rasti më i rëndë është regjistruar më 2 Gusht të vitit 2022 në plazhin e Potamit në Himarë, ku skafi që drojtohet nga ish-efektivi i policisë Arjan Tase masakroi për vdekje 7-vjeçaren Jonada Avdiaj, e cila po lahej në det.
Arjan Tase kishte dalë me skaf në bregun e detit, duke shkelur perimetrin e sigurisë, dhe e goditi fillimisht vogëlushen me pjesën ballore të mjetit lundrues dhe më pas 7-vjeçarja përfundoi poshtë skafit duke u masakruar nga helikat dhe ndërroi jetë në vend.
Familja me origjinë nga Tropoja jetonte në Angli, por ishte kthyer në atdhe për pushime. Për këtë ngjarje u shkarkua i gjithë zinxhiri drejtues i Policisë Kufitare të Vlorës, si edhe inspektorët përgjegjës.
Ndërkohë, Arjan Tase në atë kohë mbante detyrën si shefi i policimit në komunitet në Elbasan. Ai u shpall fajtor për veprën penale “vrasje me dashje” dhe u dënua me 18 vite burgim, por iu ul 1/3 e dënimit të dhënë për shkak të gjykimit të shkurtuar duke u dënuar përfundimisht me 12 vjet heqje lirie.
Këtë dënim ai e ankimoi duke kërkuar ndryshimin e kualifikimit të veprës penale duke e cilësuar vrasje nga pakujdesia dhe dënimin e tij me 5 vite burg, por Apeli e la të pandryshuar vendimin e shkallës së parë
Manovrat e rrezikshme disa here u kanë rrezikuar jetën pushuesve, siç ka ndodhur në Jalë, ku drejtuesi i një skafi Gjergj Priftuli aksidentoi një çift pushuesish. Një tjetër rast i rëndë ndodhi në plazhin e Jonufrës, ku një 40-vjeçar duke drejtuar një mjet lundrues tip gomone dëmtoi një fëmijë 7-vjeçar që ishte duke notuar në afërsi të bregut.
