Në datën 28 korrik, në sheshin “Skënderbej”, u zhvillua një koncert i organizuar nga Partia Socialiste me rastin e hapjes së negociatave me BE, por edhe në kuadër të 100-vjetorit të marrëdhënieve diplomatike SHBA-Shqipëri.
Gjatë koncertit u përcollën mesazhe urimi nga liderë botërorë, ndërsa në përmbyllje të tij nuk munguan as fishekzjarret.
Të pranishëm në koncert ishin edhe kryeministri me disa prej ministrave të kabinetit të tij.
Por Rama duket se kishte harruar deklaratën e bërë disa vite me parë, duke theksuar në Kuvend se kur të nisin aspiratat për anëtarësimin e Shqipërisë në BE, nuk do të shpërthenin fishekzjarret, si kundërshtarët e tij politik. Këtë ia kujtoi ish-kryeministri Sali Berisha, i cili publikoi edhe një video në Facebook, ndërsa shkruan: “Kësaj i thonë ç’me duhet mua se çfare kam thene une”.
“Kur të marrim statusin ne nuk do të festojmë, as do hedhim fishekzjarre si paria e vitit ’36 siç ka ndodhur deri dje, se në fakt asaj parie ia keni pasur gjithmonë zilinë dhe asaj parie jeni munduar t’i ngjani”, shprehej Rama, ndërsa në sheshin kryesor të Tiranës ndodhi e kundërta.
