Edhe pse kanë kaluar 2 vite e gjysmë nga shembja e Teatrit Kombëtar, kryebashkiaku i Tiranës Erion Veliaj ka pohuar për të disatën herë se do të hapet gara për ndërtimin e Teatrit të ri. Ky pohim i kryebashkiakut për artistët është abuzim i radhës. Në një intervistë për Syri Tv, aktori Neritan Liçaj tha se Erion Veliaj do të përgjigjet në SPAK për shembjen e teatrit.
Dy vite e gjysmë pas shembjes së Teatrit Kombëtar, Bashkia e Tiranës ka hapur garën për ndërtimin e Teatrit të ri. Lajmin e ka bërë të ditur Kryetari i Bashkisë së Tiranës, Erion Veliaj në mbledhjen e Këshillit Bashkiak (më dt 26 korrik 2022), në të cilën tha se puna për ndërtimin e godinës së re do të nisë shumë shpejt, ndërkohë ky për artistët është abuzim i radhës, një lojë politike e tyre, ndaj Veliaj për këtë do të gjendet e do të përgjigjet në SPAK.
“Erion Veliaj ka që në korrik të 2018 që thotë do ta bëjmë sot, do ta bëjmë nesër. Ka hapur 3 herë buxhetin, e hapi edhe vitin e kaluar. Dihet që Erion Veliaj gënjen. Kjo është më tepër luftë bërrylash mes tyre.
Qeveria është copash, kënaqësia popullore, varfëria dhe shpopullimi e kanë hedhur në tokë, dhe tani Veliaj e di që mund t’i mbijetojë të gjitha atyre dosjeve në SPAK, vetëm duke kapur kreun e PS-së, për më shumë përfundon në burg.
Edhe Rama e di fare mirë, që po e mori pushtetin Veliaj, të parin që çon në satër, në kuptimin politik të fjalë, është Rama vetë. Pra, është lojë për pushtet. Ky tani do të tregojë, shiko unë jam i fortë i çojë punët deri në fund, megjithatë socialistët nuk e duan.
Bëhet qesharak se thotë të njëjtën gjë, prej katër vitesh. Veliaj nuk i nis dot procedurat për Teatrin e ri, pasi ka folur Gjykata Kushtetuese. Ai do të bënte mirë të bënte Teatrin Kombëtar siç ishte me të gjitha objektet, që ka brenda.
Të gjitha këto janë lojëra dhe i bënë në një moment, kur dhe vëmendja e publikut nuk është shumë, i bënë në një moment që të mos dali bllof. Nuk mund t’i besosh më Erion Veliajt. Le të bëhet gati për të shkuar në SPAK, se do shkojë një ditë. Nuk e mban dot më as Sorrosi, as veglat e tij. Ai djali i ka punët shumë keq.”-tha Liçaj.
Kallëzimi i parë i Aleancës për Mbrojtjen e Teatrit dhe aktivistëve është bërë qysh më 31 dhjetor të 2019, e që prej asaj kohe Neritan Liçaj pohon se nuk është bërë asgjë nga SPAK-u, për të vënë drejtësi për shembjen e tempullit të kulturës.
“Ne do të bëjmë kallëzim edhe për atë që ka pohuar Erion Veliaj në Këshillin Bashkiak. Sa herë që këta të bëjnë lojëra për teatrin aq kallëzime kanë.
Për sa i përket veprimeve të SPAK-ut, ajo varet nga vetë institucioni. Unë jam vërtetë i shqetësuar pasi, e para, SPAK-u nuk duhet të jetë armë e politikës, SPAK-u duhet të jetë armë e drejtësisë.
Në ka rast ku drejtësia e reformuar duhet të tregojë vërtetë funksionin e saj të të dhënurit të drejtën qytetarëve është Teatri Kombëtar, dhe SPAK-u deri më tani nuk ka bërë asgjë.
Po bëhen dy vite e gjysmë nga kallëzimi i parë dhe ata nuk kanë lëvizur asgjë. Kjo është shqetësuese! Unë i them zotërinjëve të SPAK-ut: Të bëjnë drejtësi dhe jo politikë!”-deklaroi Liçaj.
Aleanca për Mbrojtjen e Teatrit do të vijojë betejën për të ndërtuar Teatrin Kombëtar atje ku ishte dhe ashtu siç ishte nëpërmjet rrugëve, ndërsa kallëzimet dhe denoncimet do të vijojnë.
