Arrestimi sot i vrasësit të Saimit Jakut, duket se është pjesë e një zinxhiri vrasjesh për hakmarrje mes dy familje në Rrëshen të Mirditës.
Jaku u ekzekutua në shtator 2016 dhe sipas policisë, vrasësi është një person nga Laçi me banim në Krujë, i quajtur Dorjan Keqi.
Mësohet se Keqi ishte vrasës me pagesë dhe porosia mendohet se është dhënë nga një grup kriminal që vepron në qytetin e Lezhës.
Ngjarja më e fundit që dyshohet se ka të bëjë me këtë serial vrasjesh ishte ekzekutimi me snajper në janar 2020 i Kastriot Reçit.
Vrasja e Reçit akoma nuk është zbardhur, ndërsa ka dyshime se është bërë nga një ekspert i përdorimit të snajperit, ish-pjestar i Forcave Speciale. Snajperi dyshohet se është vjedhur në Kosovë.
Si ndodhën vrasjet mes familjeve në Rrëshen
Në shtator 2020 i bëhet atentat Preng Gjinit, i cili tronditi Tiranën, pasi u krye në një zonë mjaft të populluar, ndërsa ishte vijim i kalvarit të hakmarrjes së nisur disa vite më parë për prishje të pazareve të drogës.
Në 5 vitet e fundit nga përplasja mes dy fiseve Gjini dhe Reçi janë ekzekutuar 5 persona në Belgjikë, Romë dhe Shqipëri. Sajmir Jaku, Gasper Reçi, Kreshnik Gjini, Tonin Gjini dhe Kastriot Reçi janë viktimat e hakmarrjes së egër mes dy fiseve.
Në datë 9 shtator të vitit 2016 u ekzekutua Sajmir Jaku në Rrëshen nga dy persona të armatosur. Sajmir Jaku ishte drejtori i OSHEE-së për zonën e veriut, ndërsa nga atentati mbeti i plagosur edhe një tjetër person. Jaku ishte së bashku me shokun e tij duke konsumuar një kafe në momentin që dy personat e armatosur hapën zjarr kundër tyre.
Një vit më pas në 28 prill në Itali u vra Gaspër Reçi 43 vjeç me 4 plumba. Ai u ekzekutua në Romë në banesën e tij, ndërsa autori nuk u zbulua. Në banesë në momentin e vrasjes ishte vetëm vajza e tij. Nga hetimet e autoriteteve italiane rezultoi se Reçi ishte me precedent në fushën e trafikut të drogës duke i çuar ngjarjet në pistën e hakmarrjes për prishjen e pazareve.
Nga Italia në Belgjikë. Viktima e radhës ishte Kreshnik Gjini 31 vjeç, që u ekzekutua 6 Shtator 2017 në komunën Forest. Dy persona të maskuar dhe të armatosur e qëlluan me dy plumba duke e lënë të vdekur në vend. Gjini punonte në një lokal dhe u vra përpara koleges së tij.
Në momentin kur shqiptari u fut në makinë, autorët e qëlluan direkt duke mos i lënë mundësi reagimi. Vrasja ishte e lidhur me atë në Rrëshen dhe Romë, por autorët nuk u zbuluan.
Viktima e radhës ishte Armando Gjini, i ekzekutuar në gusht 2019 në qendër të Rrëshenit. Ai njihej si pjesë e bandës së Met Kananit, i njohur nga mediat turke si “Eskobari shqiptar”. Në janar të këtij viti viktima e fundit e përplasjes mes fiseve ishte Kastriot Reçi. Ai u ekzekutua në qendër të qytetit të Rrëshenit me snajper. 47-vjçari ishte pronar i një televizioni lokal në Mirditë. Më pas, erdhi një atentat ndaj Preng Gjinit, por fatmirësisht arriti që të shpëtonte.
