Një aksident me një person të vdekur dhe një të plagosur ka ndodhur në Rrugën e Kombit.
Burime zyrtare nga policia bëjnë me dije se një ditë më parë, “në autostradën Morinë-Kukës, në fshatin Morinë, shtetasi I. M., duke drejtuar automjetin tip ‘Volkswagen’, ka humbur kontrollin mbi drejtimin e tij dhe është përplasur me trafikndarësen”.
Për pasojë është dëmtuar rëndë drejtuesi i mjetit, banues në fshatin Shtiqen.
Ky i fundit ka ndërruar jetë gjatë transportimit në Spitalin e Traumës – Tiranë, konfirmoi këtë të Martë policia.
Gjithashtu është dëmtuar bashkëshortja e tij, A.M., 36 vjeçe, e cila sipas bluve, pasi ka marrë mjekim në spitalin e Kukësit, është larguar në banesë, jashtë rrezikut për jetën.
“Materialet i kaluan Prokurorisë pranë Gjykatës së Shkallës së Parë Kukës, për veprime të mëtejshme”, mbyllet njoftimi i policisë.
