Deputeti socialist Xhemal Qefalia ka komentuar ndryshimet në qeverinë Rama, ndërsa e konsideroi shkarkimin e Arben Ahmetajt nga posti i zv.Kryeministrit si asgjë të jashtëzakonshme.
“Nuk ka asgjë të jashtëzakonshme, kryeministri ka të drejtën kushtetuese për të riparë apo ndryshuar kabinetin”, tha Qefalia në Faxnews, i cili komentoi edhe zërat se mes Ramës dhe Ahmetajt ka pasur një përplasje të fortë për inceneratorët.
“Pse duhet që të paragykojmë çdo lloj lëvizje, askush nuk e ka të përjetshëm postin e ministrit, është një aludim që bëni ju gazetarët, nëse ju do të mbështeteni te Sali Berisha mund të keni dhe gjëra të tjera për të thënë.
Se çfarë thotë zoti Meta dhe Berisha ia lëmë të ardhmes, dhe kemi ballafaqimin vitin tjetër për të parë sa mbështetje kanë nga elektoratet e tyre.
Mendoj që zoti Begaj nisur nga karriera ushtarake, i distancuar nga politika do ta kryejë më së miri detyrën si president. Bajram Begaj do ti përmbushë në mënyrë të plotë kompetencat e tij”, u shpreh Qefalia.
Sa i takon partisë së re që ka paralajmëruar të themelojë Ilir Meta, Qefalia u shpreh se për mazhorancën nuk ka rëndësi ajo që ndodh në opozitë dhe se kontratën e vetme e kanë me qytetarët.
“Qytetarët shqiptarë janë të bindur dhe e dinë se çfarë partie do të drejtojë zoti Meta, në një kohë kur gruaja e tij drejton LSI. Për ne nuk ka rëndësi se çfarë bën opozita, ne kontratën e kemi me qytetarët, dhe kemi nisur punën që Shqipëria të anëtarësohet sa më shpejt me BE-në’, tha më tej Qefalia.
