GJKKO pranoi sot kërkesën për gjykim të shkurtuar të Etleda Çiftes, anëtare e KPK-së e akuzuar për falsifikim dokumentesh dhe mosdeklarim të pasurisë.
Në përfundim të seancës, Etleda Çiftja nuk u prononcua për mediat. Avokati i saj njoftoi se seanca e radhës është caktuar të zhvillohet më 29 korrik.
Më 30 qershor 2022, SPAK dorëzoi dosjen në Gjykatë duke e akuzuar për fshehje dhe mosdeklarim të pasurisë përmes përdorimit të dokumenteve të falsifikuara. Prokuroria e Posaçme thotë se zyrtarja e lartë e vetingut ka fshehur një apartament dhe dy sipërfaqe të mëdha toke.
Etleda Çiftja u zgjodh në qershor 2017 nga Kuvendi i Republikës së Shqipërisë në postin e Komisioneres pranë Komisionit të Pavarur të Kualifikimit dhe përgjatë 5 viteve ka marrë pjesë në vendimet e shkarkimit të qindra prokurorëve e gjyqtarëve për çështje të fshehjes dhe mosdeklarimit të pasurisë.
Denoncimi ndaj zyrtares së lartë të vettingut u bë pikërisht nga avokatët që përfaqësojnë gjyqtarët dhe prokurorët e shkarkuar nga vetingu.
Më herët me drejtësinë janë përballur edhe anëtarët e KPA Ardian Hajdari dhe Luan Daci.
