Ish kreu i ARRSH, Evis Berberi i cili ndodhet në burg për korrupsion dhe abuzime me tenderat ka kërkuar gjykim të shkurtuar.
Ish-vartësi i Belinda Ballukut pretendon kthim sendesh, fshirje korrespondencë dhe pa përdorshmërinë e të dhënave të marra nga celulari i tij.
Berberi është vënë nën hetim dhe më pas nën akuzë nga SPAK për një sërë veprash penale që lidhen me korrupsion, shpërdorim detyre dhe pastrim parash.
Hetimi ka zbuluar një skemë të gjerë abuzimesh me tendera publikë, ku Berberi dyshohet se ka favorizuar kompani të caktuara në këmbim të përfitimeve financiare. SPAK ka evidentuar të paktën 8 raste të korrupsionit në procedurat e prokurimit, të cilat kapin vlerën e mbi 5 milionë eurove.
Hetimet tregojnë se tenderat e dyshimtë janë realizuar përmes manipulimit të kritereve, përdorimit të faturave fiktive dhe krijimit të një rrjeti bashkëpunëtorësh brenda dhe jashtë institucionit.
Skema
SPAK ka dyshime se shumat Berberi fillimisht si Drejtor i Efiçencës së Energjisë ka zhvilluar tre procedura prokurimi me vlerë rreth 1.2 milionë euro që janë fituar nga kompania DAAM që drejtohej nga Valter Begaj, por që defakto sipas SPAK, kompania zotërohej prej Berberit.
Po kështu SPAK dyshon se në kohën që Berberi drejtonte ARSH, e njjëta kompani ka fituar tre tendera të tjerë më vlerë rreth 1 milionë euro.
Hetimet kanë zbuluar se kjo kompani është përdorur për kalimin drejt saj të sasive të mëdha të parave, nga kompania tjetër, “Net Group”, e sipërmarrësit Begaj, përmes transaksioneve të ndryshme.
Paratë e kaluara në favor të kompanisë “Daam”, janë përdorur për të blerë prona të patundshme në emër të kësaj shoqërie. Këto veprime kanë ngritur dyshime për Prokurorët, se gjenden përballë një veprimtarie të pastrimit të parave.
Transaksionet nga “Net Group” drejt shoqërisë “Daam”, në zotërim indirekt nga zoti Berberi, përkojnë, sipas hetimeve, me kohën kur shoqëria “Net Group” rezultoi fituese e disa tenderave të të shpallur nga Agjencia për Efiçencën e energjisë dhe Autoritetit Rrugor, nën drejtimin e zotit Berberi. Bëhet fjalë për prokurime publike me një vlerë totale prej mbi 2.7 milion euro me tvsh.
