Dy persona janë arrestuar dhe një person është shpallur në kërkim, pas një hetimi një mujor të policisë nën dyshimin se do të trafikonin drogë nga Kukësi drejt Kosovës.
“Pas një hetimi 1-mujor, bazuar dhe në informacionet e siguruara në rrugë policore, se një shtetas do të trafikonte një sasi lënde narkotike drejt Kukësit, me destinacion Kosovën, organizuan dhe finalizuan me sukses operacionin policor të koduar “Cooperation”,” njoftoi policia.
Si rezultat i operacionit u bë arrestimi në flagrancë i shtetasve P. A., 47 vjeç, banues në fshatin Brekije, Kukës dhe F. K., 36 vjeç, banues në Mamurras, Kurbin. Gjithashtu u shpall në kërkim e shtetasit F. A., vëllai i shtetasit P. A..
Gjatë operacionit, në hyrje të qytetit të Kukësit, shërbimet e Policisë ndaluan automjetin tip “Benz” me drejtues shtetasin P. A., në të cilin, gjatë kontrollit, gjetën dhe sekuestruan në cilësinë e provës materiale rreth 6 kilogramë lëndë të dyshuar narkotike kanabis.
“Më pas, gjatë kontrollit të ushtruar në banesën e shtetasit P. A., shërbimet e Policisë gjetën një sasi municioni luftarak, ndërsa në afërsi të banesës së vëllait të tij, shtetasit F. A., gjetën rreth 1 kg lëndë të dyshuar eksplozive.
Në vijim të operacionit, gjatë kontrollit të ushtruar në territorin përreth banesës së shtetasit F. K., në fshatin Dardhas, shërbimet e Policisë gjetën bimë të dyshuara narkotike, që dyshohet se janë kultivuar nga ky shtetas,” njoftoi policia.
Në cilësinë e provës materiale u sekuestruan lënda narkotike, muncioni luftarak, lënda eksplozive dhe 2 automjete.
