Analisti Preç Zogaj, në rubrikën “Opinion” në News24, ka akuzuar qeverinë se është fajtorja e humbjes së kohës, pasi hapja e negociatave mund të bëhej edhe më herët.
Sipas tij, e gjitha është pasojë dhe korrupsioni vijon të mbetet një problem shqetësues për Shqipërnë.
“Hapja e negociatave nuk është anëtarësim, gjithmonë kam pasur mendimin që Shqipërisë duhet ti hapen negociatat edhe kur nuk ka gjëra që nuk shkojnë, sepse është më e keqe të qenit jashtë nën regjimin e pseudo sovranizmit që predikohet majtas djathtas.
Nëse do ishin hapur më herët nuk do të ishte mëkat, Serbia e Mali i zi kanë vite.
Por qeveria jonë ka luajtur shumë me zjarrin me standardet për Shqipërinë ka vëmendje të shtuar për mozaikun që e përbën. Lupa për ne është e madhe jo si për Ukrainën apo Kroacinë.
Kemi humbur kohë sepse dikush mendoi të bënte bashkë edhe negociatat edhe mburrjet, edhe kanabizimin edhe shit-blerjen e votës. Të gjitha dukuri që minojnë themelet e demokracisë me flamurin e BE në dorë.
Ka vite që me flamurin e BE dhe SHBA janë bërë gjëra të tmerrshme. Kjo nuk jep rezultat sjell vetëm vonesë. Sot është koha që njerëzit të gëzohen dhe qeveria të vijojnë punën se nuk ka vend për festë. thjeshtë jemi kualifikuar për provime edhe më të rënda.
Kapacitetet për të negociuar edhe mund ti gjejmë se ata që kanë ikur jashtë studiojnë në shkollat më të mira, nëse i kërkojmë i gjejmë. Tjetër gjë është të negociojmë, tjetër të përshtasim institucionet tona me të BE dhe tjetër të ekzekutojmë europianizmin. Ky është sekreti.
Këtu lëmë shumë për të dëshiruar, deputetët gjermanë folën gati siç folën kur na vunë kushtet dhe na lanë në pritje. Kushtet janë ende në fuqi dhe kryekushti është lufta ndaj korrupsionit dhe sundimi i ligjit. Sot në vend sundojnë më shumë bandat se ligji.
Jo vetëm bandat e narkotrafikut, por ata me lidhje me politikën, sundimi i ligjit është problem madhor, shoh që BE i ka dhënë rëndësi sistemit të drejtësisë në funksion të goditjes së krimit të organizuar dhe korrupsionit. Është në provë.
Instrumentet janë, mekanizmat janë ngritur, mjeti është. Në hapat e parë ka pasur probleme, selektivitet politik, ka arritje por edhe është përdorur ligji llastik. duhet të inkurajojmë SPAK e BKH.
SPAK po futet në hullinë që duhet dhe jemi në prag të ngjarjeve të rëndësishme, me SPAK kemi 3 ish zyrtarë të qeverisë që kanë rënë në pranga”, është shprehur ai.
