Nga qyteti i Durrësit, ku zhvilloi një takim me qytetarët, kreu i PD, Sali Berisha tha se demokratët, por jo vetëm, janë në një mision të jashtëzakonshëm, shpëtimin e Shqipërisë.
“Demokratët dhe jo vetëm ata, janë në një mision të një rëndësie të jashtëzakonshme, misionin e shpëtimit të Shqipërisë, shpëtimit të Durrësit nga rreziqe të cilat nga disa aspekte, po të shohim Durrësin, po të shohim në shumë dimensione, nuk ia kanë bërë as pushtuesit e tij.
Ajo që ndodh në Durrës është një, në kuptimin më të mirëfilltë të fjalës, është një barbari. Ato janë vlera të cilat nuk janë demokrate, as socialiste, janë vlera të përjetshme, i ka sjellë Durrësi dhe durrsakë në shekuj dhe mijëvjeçarë dhe tani për shkak të korrupsionit, të vjedhjes, kërkohet që gjithçka të transformohet dhe të zhduket”, tha kreu demokrat.
Berisha tha se ajo që po ndodh dhe ka ndodhur me Durrësin, është një barbari, që as pushtuesit nuk ia kanë bërë këtij qyteti.
“Për shkak të korrupsionit dhe vjedhjes kërkohet që gjithçka të transformohet dhe zhduket, mirëpo kjo është historia e Durrësit, është investimi shekullor i durrsakëve.
Edi Rama sot ngriti flamurin e BE-së para Kryeministrisë. Së pari dua të theksoj se ai është flamur i vlerave kulturore, njerëzore, të lidhura me lirinë. E vërteta është se fatkeqësia më e madhe për atë flamur, ishte fakti se e mbante në dorë Edi Rama. E kam cilësuar Ramën me 7 korrik një armik, sepse ai nuk lejon shqiptarët të votojnë. Dhe nëse nuk ke votën nuk ka liri, nëse nuk ka votë të lirë, nuk ka dinjitet”, tha Berisha.
Ai akuzoi Kryeministrin Rama se ka shkelmuar votën jo vetëm në shoqërinë shqiptare, por edhe brenda Partisë Socialiste.
“Nuk mund të imagjinohet një vend që vuajti për 46 vite nga një parti që nuk votonte, që kryente akte terroriste. Pse i kryente këto akte? Sepse nuk lejonte votën”, tha Berisha.
Gjithashtu ai akuzoi Kryeministrin Edi Rama se ka mashtruar shqiptarët me negociatat, pasi në 2018 hapi edhe shishen e shampanjës, shpërndau edhe dekorata.
