Vajza e vogël e këngëtares Rona Nishliu, Noa feston ditëlindjen e saj të tretë. Për ditën e veçantë të vogëlushes u organizua një festë e ëmbël, ndërkaq mami Rona emocionoi me shkrimin e saj dedikuar Noas.
“Të dashur miq,
Meqenëse me ju kam ndarë pothuajse çdo emocion personal dhe profesional, s’kam si të mos ndaj edhe emocionet që më fali ardhja e saj në jetën time, tre vjet më parë, gëzimi im parë, Vajza Noa, siç ka qejf ta thërras “xemla” ime e vogël!
Noa, për ty u luta çdo natë dhe gjatë…
E ti më lumturove, për herë të parë kur më dhe shenja se po rriteshe brenda meje, e pastaj edhe më shumë, si sot para 3 vjetëve, kur pas 17 orëve jo dhe aq të lehta e gjithë vonesa e komplikime, vendose të shkëputesh nga trupi im dhe më erdhe si bekimi më i çmuar në jetë.
Noa, dije mirë se ti je një mrekulli dhe unë thjesht të dua e të adhuroj.
Qofsh e gëzuar dhe e përmbushur me çdo gjë që të sjell jeta, fat e shëndet paç përherë, dëshirë e vullnet të mësosh e provosh, trimëri, guxim dhe mençuri ta sfidosh veten, e dashuri paç për gjithë universin. Noa, veç ji vetvetja, veç ec drejt, me mend në kokë, e kurrë mos e harro zemrën në kraharor. Jeta e fati qofshin bujare me ty “xemla” ime e vogël, e gëzofsh çdo sekondë të jetës.
Gëzuar 3 vjetorin e lindjes Vajza Noa!!!
TË DUA”
