Kreu i organit qendror të akuzës, Adriatik Llalla priti sot kreun e Antimafias italiane, Franco Robertin, me të cilin ka biseduar për luftën kundër drogës dhe investimet e parave të përfituara nga krimi.
Pas këtij takimi dy zyrtarët e lartë kanë mbajtur një konferencë të përbashkët shtypi.
Roberti dha alarmin e rritjes së trafikut të drogës nga Shqipëria drejt Italisë. Duke folur për trafikun e drogës, ai u shpreh se është trefishuar sasia e drogës e kultivuar nga Shqipëria.
“Trafiku i drogës Shqipëri-Itali, në rritje. Interesi i përbashkët mes dy vendeve është të luftojnë jo vetëm drogën, por edhe korrupsionin. Duhet bashkëpunim mes dy vendeve për luftën ndaj krimit. Bisedime për të përmirësuar strategjitë. Shkëmbimi i informacioneve shumë efikas”, tha Roberti
Roberti deklaroi se Prokuroria Italiane bën shumë sekuestrime.
“Ne kemi bërë me qindra arrestime, për të luftuar korrupsionin. Prokuroria Italiane bën shumë sekuestrime. Të gjithë zyrtarët që kanë pasur lidhje me organizatat kriminale janë arrestuar”, theksoi Roberti.
Ndër të tjera Roberti ka vlerësuar se shkëmbimi i informacioneve është shumë efikas dhe ne do të bashkëpunojmë ngushtë me Prokurorinë shqiptare.
“Kemi caktuar një gjykatës që të qëndrojë pranë Ministrisë së Drejtësisë”, mësohet të ketë thënë ai, raporton Syri.net.
Llalla deklaroi se ka disa raste të sekuestrimit të pronave dhe shumë procedime penale. Më tej, ai foli për dy prokurorët e pezulluar sot, duke thënë se ka dyshime se janë përfshirë në vepra penale.
“Kemi disa raste të sekuestrimit të pronave dhe shumë procedime penale. Falënderim të veçantë për Gjykatën e Lartë, që dha një vendim të drejtë për autorët e masakrës së Vlorës. Ka dyshime se dy prokurorët e pezulluar sot janë përfshirë në vepra të ndryshme penale. Do hetohen”, tha Llalla.
