Gjykata e Lartë ka lënë në fuqi dënimin me tetë vjet e nëntë muaj burg për Safet Bajrin.
Kjo gjykatë ka lënë në fuqi vendimin e dhënë nga Gjykata e Shkodrës me njohjen e vendimit të gjykatave belge.
Bajri prej muajsh kërkon edhe lirinë me kusht. Kjo kërkesa e tij është rrëzuar nga gjykata. Atij i kanë mbetur edhe disa muaj nga vuajtja e dënimit.
Nga mesi i qershorit gjykata e Shkallës së Parë Fier ka rrëzuar kërkesën për liri të anëtarit të bandës së Shkodrës. Kjo në bazë të kërkesës së prokurorit të çështjes Genci Mane, i cili ka kërkuar të mos marrë në konsideratë kërkesën për liri të Safet Rustemi.
Kush është Safet Bajri
Bajri akuzohet për trafik droge e prostitucion nga Gjykata e Brukselit. Për këto akuza ai është dënuar nga Apeli në Bruksel me 9 vite burgim.
Në Shqipëri, Safet Bajri akuzohet për trafik droge, vrasje, gjobëvënie e shantazh. Bajrit i janë sekuestruar një sërë pronash në Shqipëri.
Ai u ndalua në ambientet e një magazine në zonën e “Xhamllikut” katër vite më parë, në kryeqytet, ndërsa mbante edhe një armë pa leje.
Arrestimi i tij u krye në kuadër të një procedimi penal të nisur nga Prokuroria e Krimeve të Rënda, prej afro një viti, pas dyshimeve për përfshirjen e tij apo drejtimin e një organizate kriminale të trafikut të lëndëve narkotike.
Nga ana tjetër, ai figuronte në listën e personave më të kërkuar të Belgjikës, i dënuar me 9 vjet burg si kreu i një bande kriminale, që përpiqej të kontrollonte trafikun e drogës në Bruksel.
