Deputetja demokrate Ina Zhupa ka qenë pjesë e protestës së thirrur nga ish-kryeministri Sali Berisha, përpara kryeministrisë, e cila u përmbyll pas dy orësh, dhe nuk u shënua asnjë incident.
Zhupa e quajti këtë një protestë madhështore, ndërsa vlerësoi kolegët demokratë që iu bashkuan protestës, pavarësisht ndasive që kanë pasur me Berishën.
“Ishte një protestë madhështore, me qytetarë të revoltuar, nuk pati asnjë konflikt, asnjë incident, nuk kishte asnjë përpjekje që ne t’iu drejtoheshim institucioneve.
Demokratët kanë në thelb votën e lirë. Mua më vjen mirë që shumica të kolegëve të mi ju bashkuan protestës, do të doja që të ishim të gjithë së bashku, nuk ka kauzë më të rëndësishme se rrëzimi i qeverisë.
Ndihem e keqardhur që kishte disa mungesa, shumica e shqiptarëve besojnë te PD, te ringritja e PD, në zgjedhjet lokale ne do të tregojmë që jemi të aftë të fitojmë dhe do të fitojmë.
Kjo protestë, do tiu mbushë mendjen edhe deputetëve, që të bëhen pjesë e këtij uragani. Protesta paqësore nuk do të thotë që do të presim 2025 për ndryshimin e qeverisë, ka nisur një cikël i ri, një valë protestash që do të krijojë dallgë”, tha Zhupa.
