Policia e Shkodrës ka arrestuar dy të rinj, të akuzuar për kultivim të lëndëve narkotike. Pas kontrolleve në territor, duke përdorur edhe dronë, në vendin e quajtur “Pylli i Staneve të Gakut”, në fshatin Gimaj, në një ambient të hapur, në terren të pyllëzuar, janë gjetur të kultivuara bimë të dyshuara narkotike cannabis sativa.
Në vijim të kontrollit të territorit, në afërsi të këtij ambientit u bë e mundur kapja dhe arrestimi në flagrancë i E. D., 25 vjeç, banues në fshatin Grudë e Re, Shkodër dhe M. N., 23 vjeç, banues në lagjen “3 Heronjtë”, Shkodër.
Atyre iu gjet dhe iu sekuestrua edhe një arme zjarri automatik dhe municion luftarak, në një ambient në afërsi të sipërfaqes së mbjellë me bimë narkotike.
Të arrestuarit akuzohen për veprat penale “Kultivimi i bimëve narkotike”, kryer në bashkëpunim dhe “Mbajtja pa leje e armëve dhe i municionit”.
