Taulant Balla, kreu i Grupit Parlamentar i PS, nga foltorja e Kuvendit, u shpreh se javën e ardhshme do të mbahej Konferenca e Parë Ndërqeveritare mes BE-së dhe Shqipërisë.
Balla tha se kjo ishte meritë e disa prej qeverive por më së shumti e asaj socialiste, duke shtuar se nëse javën e ardhshme do të mbahej një protestë atëherë po bëhej ndaj vetë shqiptarëve dhe jo ndaj qeverisë.
“Javën e ardhshme do të mbahet konferenca e parë ndërqeveritare për hapjen e negociatave për anëtarësim në BE. Kjo është fitore e të gjithëve dhe prandaj do i kërkoja çdo kolegu deputet që ndjen përgjegjësi që këtë moment historik të mos ta ndajmë por ta përcjellim me përgjegjësinë që i takon këtij momenti historik. Mbajtja e konferencës së parë ndërqeveritare është kontribut i shumë qeverive por kjo qeveri ka meritën e pazëvendësueshme. A janë përmbushur të gjitha gjërat? Natyrisht që ka ende rrugë përpara, Shqipëria po negocion dhe do të negociojë për t’u anëtarësuar në BE”, tha Balla.
