Deputeti Belind Këlliçi, ka folur rreth zhvillimeve të fundit brenda Partisë Demokratike. I ftuar në emisionin Debat në A2CNN, është shprehur se pas Enkelejd Alibeajt qëndron Lulzim Basha.
Këlliçi shprehet se Basha tashmë i përket të shkuarës ndërsa problemi për të është se Alibeaj së bashku me grupin e tij nën logon e PD po bën lojën e Ramës.
“Lulzim Basha është irelevant për momentin. Basha për mua është i shkarkuar në kuvendit e dhjetorit.
Basha për mua i përket të shkuarës, problemi qëndron tek e tashmja, që Alibeaj me një grup tjetër që nën logon e PD, sot bën lojën e Ramës.
Nuk ka gjykatë në botë që e bën sot Lulzim Bashën kryetar opozite,sepse e kishte gjykatën, vulën dhe në 6 mars e nxorri këtë logo forcë të tretë”, tha Këlliçi.
Lidhur me zgjedhjet e brendshme në PD, deputeti demokrat tha se është një proces i brendshëm.
“Hyra në një garë, së bashku me tre kolegë të tjerë të nderuar, për të cilët unë kam një respekt shumë të madh. Dy do zgjidheshin, dy u zgjodhën dhe nuk ka asgjë. Jemi në aksionin tonë parlamentar, jemi në opozitë, nuk ka asgjë.
Përsa kohë vendosi vota, nuk ka asnjë problem. Nuk e kuptoj, ka një tentativë prej dy javësh që të bëhet lajm kjo, të bëhet sensacion aq i madh, kur vetë ne aktorët në fjalë, që kemi qenë pjesë e procesit, nuk kemi parë të ketë një problem.
Çështja është e tillë, u vendos me votë. U votuan vetë anëtarët e Këshillit Kombëtar dhe gjykuan që në këto dy pozicione duhet të pozicionohen zoti Oerd Bylykbashi dhe zoti Luçiano Boçi, të cilët unë kam një respekt shumë të madh, kanë edhe një eksperiencë më të gjatë parlamentare se unë dhe janë sot në pozicionet e nënkryetarëve të PD-së. Kaq është”, nënvizoi deputeti.
