Një kontratë publike me vlerë rreth 48.8 milionë lekë me TVSH për sistemimin dhe asfaltimin e rrugës Staravec-Shimcan-Zimur në Dibër vijon të ngrejë pikëpyetje, pasi edhe pse kanë kaluar pothuajse 9 vite nga lidhja e kontratës, investimi ende nuk është përfunduar.
Sipas të dhënave të prokurimit publik, në vitin 2017 Bashkia Dibër zhvilloi procedurën për objektin “Sistemim asfaltim rruga Staravec-Shimcan-Zimur”, me fond limit 41.250.000 lekë pa TVSH.
Në garë mori pjesë vetëm një operator ekonomik, kompania “SELAMI” sh.p.k, e administruar nga Musa Selami, e cila u shpall fituese më 19 maj 2017.
Oferta fituese ishte 40.676.020 lekë pa TVSH, ndërsa kontrata e lidhur me Bashkinë Dibër kishte vlerë totale 48.811.224 lekë me TVSH. Marrëveshja u firmos më 8 qershor 2017, me një afat zbatimi prej vetëm 4 muajsh.
Por, ndonëse afati i parashikuar në kontratë ishte disa muaj, realiteti në terren rezulton ndryshe. Në vitin 2026, banorët e zonës vijojnë të përballen me një rrugë që nuk është përfunduar sipas pritshmërive të projektit, duke ngritur pikëpyetje se çfarë ka ndodhur me zbatimin e kësaj kontrate dhe përse një investim i financuar me para publike ka mbetur pezull për kaq gjatë.
Vetëm një kompani në garë
Një tjetër element që bie në sy në këtë procedurë është mungesa e konkurrencës. Tenderi u zhvillua me vetëm një operator ekonomik pjesëmarrës, pikërisht kompaninë që më pas fitoi kontratën.
Mungesa e ofertave konkurruese është një nga treguesit që në analizat e prokurimeve publike konsiderohet si faktor risku, pasi ul mundësinë që autoriteti kontraktor të përfitojë kushte më të favorshme ekonomike dhe teknike.
Kush është kompania “SELAMI”?
Shoqëria “SELAMI” sh.p.k është themeluar në vitin 1998 dhe ka aktivitet në fushën e ndërtimit, prodhimit të inerteve, asfalt-betonit, punimeve infrastrukturore, rrugëve, ujësjellësve, kanalizimeve dhe tregtimit të materialeve të ndërtimit.
Sipas të dhënave të Qendrës Kombëtare të Biznesit, kompania ka një kapital themeltar prej 570.141.013 lekësh dhe rezulton aktive.
Megjithatë, në historikun e saj figuron edhe një çështje përmbarimore. Në vitin 2013, ndaj kompanisë u vendos masë sekuestro konservative mbi kuotat dhe të drejtat që rridhnin nga zotërimi i tyre për një detyrim prej 7.053.205 lekësh, masë e cila u hoq në vitin 2016.
Pyetjet që kërkojnë përgjigje
Pas një kontrate që parashikonte përfundimin e punimeve brenda 4 muajve, sot lindin disa pyetje:
Përse rruga Staravec-Shimcan-Zimur nuk është përfunduar ende pas gati një dekade?
A janë kryer të gjitha pagesat ndaj kompanisë fituese?
A ka pasur penalitete për vonesat në zbatim të kontratës?
Kush mban përgjegjësi për mosrealizimin në kohë të një investimi publik?
Rasti i rrugës Staravec-Shimcan-Zimur është një tjetër shembull ku fondet publike janë kontraktuar për infrastrukturë, por rezultatet në terren mbeten larg afatit të përcaktuar në dokumentet zyrtare.
Maska kërkoi një reagim nga zoti Selami, i cili u shpreh në telefon se ai e ka kryer punën e tij dhe se autoritetet e kanë marrë në dorëzim objektin.
Skandali më i madh nis pikërisht këtu, pasi zoti Selami dhe autoritetet duhet të hetohen nga SPAK. Rruga nuk ka përfunduar, megjithatë ajo është marrë në dorëzim dhe është konsideruar si e përfunduar.
Maska.al do të vijojë të ndjekë këtë çështje, duke kërkuar transparencë mbi zbatimin e kontratës, pagesat dhe përgjegjësitë institucionale për vonesën e këtij investimi. /MASKA
