Asambleja e Urdhrit të Psikologut u mblodh këtë të premte, me pretendimin se do të shqyrtonte dhe miratonte një sërë çështjesh që lidhen me funksionimin financiar dhe administrativ të institucionit, mes tyre buxhetin e vitit 2025, projektbuxhetin për vitin 2026 dhe raportin e auditimit financiar.
Megjithatë, mbledhja u shoqërua me debate, tensione dhe pakënaqësi nga një pjesë e konsiderueshme e anëtarësisë, duke rikthyer kritikat e vjetra mbi mungesën e dialogut dhe transparencës.
Qindra psikologë nga qytete të ndryshme të vendit morën pjesë në asamble me pritshmërinë për të diskutuar mbi çështjet e rendit të ditës dhe për të kërkuar sqarime mbi administrimin e fondeve të institucionit, megjithatë sipas raportimeve, kërkesat për të marrë fjalën dhe për të ngritur pyetje hasën në vështirësi, duke krijuar pakënaqësi në sallë.
Në qendër të kritikave u vu presidentja e Urdhrit të Psikologut, Valbona Treska, ndaj së cilës pjesëmarrësit kërkuan më shumë llogaridhënie dhe hapësirë për debat por kjo e fundit nuk i ka lejuar.
Mësohet se gjatë mbledhjes psikologët kërkonin të flisnin, të pyesnin, të dëgjonin shpjegime mbi mënyrën se si janë shpenzuar milionat e lekëve të paguara nga ata. Por kërkesa për fjalë është trajtuar si bezdi procedurale nga Treska, dhe jo si thelbi i një asambleje.
Një tjetër element që ka ngjallur reagime ishte mungesa e mediave në sallë, ç’ka u interpretua nga pjesëmarrësit si një kufizim i transparencës në një proces që prek drejtpërdrejt interesat e anëtarësisë.
Në pëfundim, mbledhja në të cilën supozohej të diskutoheshin pakënaqësitë u mbyll, duke mos përmbushur as misionin minimal për të dëgjuar profesionistët që pretendon të përfaqësojë. Këta të fundit janë bashkuar njëzëri “Bona Jepe dorëheqjen”, duke kërkuar largimin e Treskës ashtu sikurse edhe Rama.
Për shumë prej të pranishmëve, ajo që ndodhi këtë të premte ishte një tjetër dëshmi se problemet e ngritura prej kohësh mbi komunikimin mes drejtuesve dhe anëtarësisë vijojnë të mbeten të pazgjidhura në këtë institucion. Prandaj, edhe pse bëhej fjalë për një mbledhje të re, për shumë psikologë avazi dukej i njëjtë.
