Juristja Brunilda Laboviti ka ngritur shqetësime të forta për situatën në Urdhrin e Psikologut, duke deklaruar se institucioni po përballet me një ngërç ligjor dhe administrativ pas përfundimit të mandatit të drejtueses aktuale.
E ftuar në studion e Ora News, Laboviti tha se kriza e brendshme është reflektuar edhe në përplasjet e vazhdueshme mes drejtuesve dhe anëtarësisë, ndërsa vuri në pikëpyetje legjitimitetin e vendimmarrjes në institucion.
Sipas saj, presidentja aktuale e Urdhrit të Psikologut, Valbona Treska, e ka pranuar vetë se mandati i saj ka përfunduar, ndërsa çdo kundërshtim është orientuar drejt gjykatës.
Juristja kritikoi gjithashtu mënyrën se si u trajtua media gjatë zhvillimeve të fundit, duke pretenduar se gazetarëve nuk iu krijuan kushtet e nevojshme për të raportuar lirisht dhe në mënyrë transparente.
“Në territorin e Shqipërisë ajo e kupton shumë mirë që askush nuk dëshiron ta ketë përfaqësuese të Urdhrit të Psikologut”, u shpreh Laboviti, duke shtuar se anëtarësia ka shfaqur hapur kundërshtitë e saj ndaj drejtimit aktual të institucionit.
Laboviti solli në vëmendje edhe faktin se juristi i institucionit është larguar prej kohësh nga detyra, çka sipas saj ka krijuar paqartësi ligjore dhe ka ndikuar negativisht në funksionimin normal të Urdhrit të Psikologut.
Deklaratat e juristes vijnë pasi Asambleja e Urdhrit të Psikologut u shoqërua me debate dhe tensione.
Në mbledhje pritej të diskutoheshin çështje të rëndësishme financiare dhe administrative, përfshirë buxhetin e vitit 2025, projektbuxhetin e vitit 2026 dhe raportin e auditimit financiar.
Megjithatë, sipas pjesëmarrësve, qindra psikologë të ardhur nga qytete të ndryshme të vendit nuk patën mundësi të merrnin përgjigje për pyetjet e tyre mbi administrimin e fondeve dhe funksionimin e institucionit.
Kërkesat për debat dhe sqarime u shoqëruan me pakënaqësi, ndërsa mungesa e mediave në sallë u interpretua si një tjetër tregues i mungesës së transparencës.
Në fund të mbledhjes, një pjesë e anëtarëve kërkuan dorëheqjen e Valbona Treskës, duke argumentuar se problemet e ngritura prej kohësh mbi transparencën, dialogun dhe përfaqësimin e psikologëve vijojnë të mbeten pa zgjidhje.
