Ish-ambasadori Agim Nesho lëshoi akuza të forta ndaj kryeministrit Edi Rama, duke deklaruar se kreu i qeverisë po përballet me një situatë që nuk arrin më ta kontrollojë dhe se retorika e tij e ditëve të fundit tregon pasiguri politike dhe frikë nga zhvillimet e brendshme.
I ftuar në emisionin “Task Force”,Nesho tha se Rama po përpiqet të largojë vëmendjen nga problemet reale të vendit përmes krahasimeve historike dhe mesazheve politike, ndërsa përballet me pakënaqësi në rritje dhe protesta qytetare.
“Në retorikën e ditëve të fundit duket se është i frikësuar. Duket se është përballë të papriturave, pasi nuk e kontrollon më pushtetin e tij të korruptuar e megaloman, duke projektuar nga njëra anë armiq të jashtëm dhe duke bërë paralelizma me ngjarje historike të papranueshme. Shikojmë një Edi Rama që vazhdon për inerci, por që është përballë protestuesve, të cilët duhet të respektohen dhe të përkrahen për iniciativën e tyre”, u shpreh Nesho.
Ish-ambasadori tha se qeveria ka dështuar të ndërtojë një model të qëndrueshëm zhvillimi për vendin, duke lënë pas dore sektorë të rëndësishëm të ekonomisë dhe duke u fokusuar vetëm tek investimet në turizëm.
“Shqipëria është një vend me minerale, me rezerva ujore dhe me potencial të madh në bujqësi, por i ka munguar vizioni. Ky popull po drejtohet drejt varfërisë dhe jo drejt mirëqenies. Ndërkohë që promovohen resortet luksoze, shqiptarët po largohen masivisht nga vendi në kërkim të një jete më të mirë”, tha ai.
Nesho e cilësoi emigracionin si treguesin më të qartë të dështimit të qeverisjes, duke pretenduar se vendi po shndërrohet në një ekonomi rentiere që favorizon një grup të ngushtë interesash pranë pushtetit.
Ai komentoi edhe deklaratat e Ramës në lidhje me çështje ndërkombëtare, duke thënë se kryeministri po përpiqet të krijojë narrativa politike për të fituar mbështetje në qarqe të caktuara ndërkombëtare.
“Rama përmend legjitimitetin, por raportet ndërkombëtare kanë evidentuar probleme serioze në proceset zgjedhore. Ai e përdor këtë argument sepse e di se përballet me pikëpyetje të mëdha për mënyrën se si është ushtruar pushteti në Shqipëri”, deklaroi Nesho.
Duke u ndalur te politika e jashtme, ish-ambasadori tha se Shqipëria po has vështirësi në procesin e integrimit europian dhe se marrëdhëniet me partnerë të rëndësishëm ndërkombëtarë nuk janë në nivelin e duhur.
Sipas tij, mënyra se si po menaxhohen projektet strategjike dhe asetet kombëtare rrezikon të dëmtojë interesat afatgjata të vendit. Nesho argumentoi se qeveria po përdor pasuritë e Shqipërisë për të siguruar influencë dhe mbështetje politike, një qasje që, sipas tij, mund të ketë pasoja të rënda për të ardhmen ekonomike dhe politike të vendit.
